Ministri i Financave i RMV-së, Fatmir Besimi dhe ministrja e Financave dhe Ekonomisë së Republikës së Shqipërisë, Anila Denaj, u takuan në margjinat e Dialogut të Forumit të Prespës në Ohër për të diskutuar për përmirësimin e lidhjes së ndërsjellë përmes projekteve në energjetikë, infrastrukturë si dhe lehtësimin e tregtisë mes dy vendeve, njofton Ministria e Financave, transmeton Portalb.mk.
Sipas kumtesës, në pjesën rrugore të Korridorit 8, tashmë punohet në aksin rrugor Kërçovë – Ohër, ndërsa është nënshkruar Memorandum për mirëkuptim për përgatitjen projektuese dhe ndërtimin e akseve të autostradës Tetovë – Gostivar – Bukojçan dhe autostradës Trebenishtë – Strugë – Qafë Thanë.
Ministria e Financave, së bashku me institucionet kompetente, ndërmorën aktivitete për financimin e projektit për ndërtimin e linjës hekurudhore Kërçovë – kufiri me Shqipërinë, përkatësisht faza e parë e aksit Kërçovë – Strugë.
Plani i përbashkët aksional për lehtësimin e tregtisë dhe transportit në Balkanin Perindimor do të thotë zhvillim i Projektit rajonal për lehtësimin e tregtisë dhe transportit në Balkanin Perëndimor, i cili do t’i zbatojë aktivitete identifikuese në çdo vend. Projekti është me karakter rajonal dhe në fazë fillestare si dhe do të përfshijë Maqedoninë e Veriut, Serbinë dhe Shqipërinë dhe më tej do të bashkëngjitet Bosnja, Mali i Zi dhe Kosova.
Parashikohet vendosja e Sistemit nacional njësportel, me module të përmisuara të EXIM dhe CDEPS , si dhe përmirësimi i pikave kufitare dhe terminaleve në Deve Bair dhe Qafë Thanë.
U nënshkrua marrëveshje për vendosjen e kontrolleve të përbashkëta kufitare dhe doganore në pikat kufitare ndërmjet Republikës së Maqedonisë së Veriut dhe Republikës së Shqipërisë, si dhe pritet realizimi i punëve ndërtimore nga viti 2022 deri në vitin 2023.
Në këtë takim u theksuan edhe përpjekjet për konsolidimin fiskal të Republikës së Maqedonisë së Veriut, si dhe për dyfishimin e rritjes ekonomike dhe arritjen e normave vjetore të rritjes së BPV-së prej rreth pesë përqind.
Portalb.mk vazhdimisht ka rikjutuar premtimet që diskutohet vetëm në tryezat e zyrtarëve të të dyja vendeve për projektet në fjalë dhe për nevojën e përforcimit të bashkëpunimit mes Shqipërisë dhe Maqedonisë posaçërisht në sferën e infrastrukturës së dy vendeve fqinje, gjë që do të çojë deri në rritjen e përfitimeve ekonomike.
Në Katalogun vjetor të Odës Ekonomike Veri-Perëndimore (OEMVP) së theksohet se në përgjithësi, Republika e Shqipërisë nuk paraqet një partner të rëndësishëm për Maqedoninë, duke zënë vendin e 18-të në eksporte dhe vendin e 26-të në importin e mallrave dhe shërbimeve në vitin e fundit të analizuar 2019.
Në perëndim të Maqedonisë së Veriut, ka një ngecje të madhe në zhvillimin e infrastrukturës rrugore. Sipas OEMVP, kushtet e këtilla rrugore bëjnë që vendi jonë të humbas shumë në zhvillimin ekonomik.
Gjitashtu, ndërtimi i “Rrugës së Arbërit” do të sjellë përfitime të mëdha për ekonominë e dy vendeve dhe Maqedonia do të mund të ketë qasje në bregdetin shqiptar. Por, përderisa Shqipëria është në fund të punimeve të kësaj rruge, në RMV punimet janë në fazë prokurimi.
