Rreth 200 mijë qytetarë në vend kanë një formë të sëmundjes së veshkave, ndërsa 1.600 pacientë shkojnë në dializë në 23 qendra në të gjithë vendin. Dializa është metoda më e zakonshme në vend për trajtimin e sëmundjes stadit të fundit të sëmundjes së veshkave, kur të dy veshkat nuk mund të funksionojnë më. Pacientët kalojnë 4 deri në 5 orë që t’ju pastrohet gjaku nga të gjitha toksinat dhe uji i tepërt në trup, njofton Portalb.mk.
Çdo të enjte të dytë të marsit, shënohet Dita Botërore e Veshkave në më shumë se 200 vende të botës.
Këtë vit, për shkak të pandemisë, Shoqata e të sëmurëve nga veshkat “Nefron” anuloi të gjitha ngjarjet tradicionale dhe po përqendrohet në edukimin dhe mbështetjen e fushatës së këtij viti “Jeto në mënyrë cilësore me sëmundjen e veshkave”.
“Cilësia e jetës së pacientëve me sëmundje kronike të veshkave ndryshon në varësi të karakterit, mjedisit, atmosferës familjare, trajtimit që marrin dhe sëmundjeve të tjera shoqëruese. Të pranuarit e mënyrës së re të të jetuarit me të gjitha kufizimet që ajo bart është e vështirë dhe të gjithë e përjetojnë ndryshe. Pacientët me sëmundje të veshkave kanë nevojë për më shumë mbështetje nga personeli mjekësor, si dhe familja dhe shoqëria në përgjithësi, në mënyrë që ata të kapërcejnë pranimin e sëmundjes dhe të vazhdojnë të jetojnë me të”, theksojnë nga Shoqata “Nefron”.
Ata shtojnë se edhe pse metoda më optimale për trajtimin e sëmundjes së veshkave është transplantimi i veshkave, përsëri në vendin tonë kjo metodë është nuk është mjaftueshëm e aplikueshme.
Sëmundja e veshkave është sëmundje jo-ngjitëse që prek aktualisht mbi 850 milion njerëz në të gjithë botën. Një në dhjetë të rritur ka një formë të sëmundjes kronike të veshkave. Mbi 2 milion njerëz në të gjithë botën trajtohen me dializë ose transplantim. Në suaza globale, SKV (Sëmundja Kronike e Veshkave) po rritet çdo vit dhe parashikohet që në vitin 2040 të jetë shkaku i 5-të kryesor i vdekjeve në vit.
