Dekani i Fakultetit për Siguri, prof. dr. Nikolla Dujovski sot tha se qëllimi i alarmeve të rreme për bomba në shkollat e mesme është shkaktimi i frikës dhe i panikut te popullata dhe se shkollat nuk janë zgjedhur rastësisht. Kjo, thotë ai, është pikërisht “si në libra” se si bëhet një kërcënim hibrid.
“Ky trend ka filluar para disa muajsh, fillimisht në Serbi, Beograd, Novi Sad, pastaj në Sarajevë. Ja tani edhe te ne. Po, është pjesë e kërcënimeve që për momentin mbeten vetëm në fazën e mesazheve të dërguara gabimisht, por policia ka përgjegjësi dhe është mirë që vepron në atë mënyrë. Fëmijët, mësuesit dhe të gjithë të pranishmit në shkolla duhet të evakuohen menjëherë dhe të dërgohen në vend të sigurt dhe policia të hetojë çdo raportim për bombë ose çfarëdo kërcënimi. Është duke u bërë dhe do të bëhet në periudhën e ardhshme. Ministria e Punëve të Brendshme po i ndërton kapacitetet që të mund t’u përgjigjen kërcënimeve të tilla, të përgjojnë mesazhe të tilla, t’i analizojnë dhe thjesht t’i parandalojnë”, tha profesor Dujovski në programin e mëngjesit në TVM.
Qëllimet e njerëzve që i dërgojnë këto mesazhe, thekson dekani i Fakultetit për Siguri, për të shkaktuar frikë dhe panikë te popullata janë më se evidente.
“Me siguri nuk është e mundur të bëhet ndonjë dëm më i madh përveç mesazhit të shkruar, por sigurisht që ne duhet të kemi kujdes sepse thjesht bota dhe veçanërisht ky rajon është shumë i ndjeshëm ndaj kërcënimeve të tilla hibride dhe çdo gjëje tjetër që mund të shkaktojë shqetësim. Shkollat nuk janë zgjedhur rastësisht, sidomos shkollat e mesme. Për shkak se atje fëmijët udhëtojnë të pavarur, prindërit zakonisht nuk e dinë se cili është procesi derisa fëmijët janë atje dhe kjo pikërisht është sipas librit kur bëhet një kërcënim hibrid”, thotë Dujovski.
Sipas tij, është mirë që shkëmbejmë informacione në rrjetin e NATO-s sepse këto çështje nuk janë vetëm për Maqedoninë dhe nuk jemi i vetmi vend i ekspozuar ndaj presioneve të këtilla dhe është mirë që t’i ndërtojmë kapacitetet tona edhe mëtej.
“Shpresoj që kjo tendencë do të qetësohet dhe shpresoj që institucionet do t’i përkushtohen nivelit të detyrës, në fakt si deri më tani”, tha dekani i Fakultetit për Siguri.
Ministri i Punëve të Brendshme, Oliver Spasovski dje bëri të ditur se pjesa më e madhe e kërcënimeve për bombat e vendosura nëpër shkollat e mesme janë lokalizuar prej nga vijnë dhe se Ministria po punon në mbrojtje.
Dje në Shkup në nëntë shkolla të mesme ka pasur raportime të rreme për bomba të vendosura.
