Rreth 1100 prindër janë deklaruar se nuk pranojnë t’i vaksinojnë fëmijët e tyre kundër fruthit. Rreth 600 prej tyre janë në territorin e kryeqytetit, ndërkaq pas Shkupit, Kumanova dhe Strumica kryesojnë për nga numri më i lartë i prindërve të cilët kanë nënshkruar deklaratë se nuk pranojnë t’i vaksinojnë fëmijët. Këta prindër do të thirren nga ana e Inspektoratit Sanitar Shëndetësor për të paguar gjobë prej rreth 500 eurosh. Nëse nuk e bëjnë një gjë të tillë, atëherë do të pasojë padi kundërvajtëse.
“Numri më i madh i këtyre personave janë prindër që kanë fëmijët të moshave shkollore dhe janë të dhëna të grumbulluara prej kur ka filluar vaksinimi në terren. Dënimi i dhënë për fëmijën e pa vaksinuar nuk e amniston, përkatësisht nuk e liron prindin nga detyrimi për vaksinimin e rregullt. Pagimi i gjobës nuk do ta liroj fëmijën të mos shkojë në çerdhe”-pohoi Irina Buhova, Inspektorati Shtetëror Sanitar Shëndetësor.
