29/03/2024
9.3 C
Tetovo

Të tjera lajme

Me rritjen e pagës minimale, do të ketë edhe rritje graduale të rrogave tjera

Pas vendimit të Këshillit Ekonomik-Social për rritjen e pagës minimale në 18.000 denarë, organizatat sindikaliste bëjnë thirrje që të respektohen marrëveshjet kolektive dhe neni 8 i Ligjit për Pagën Minimale për rritje graduale edhe të rrogave të tjera.

Sindikata e punëtorëve nga administrata, organet gjyqësore dhe shoqatat e qytetarëve (AOGJSH) dje reagoi se duhet edhe pagat tjera të rriten gradualisht, në të kundërtën paralajmëruan se do të jenë të detyruar që të aktivizojnë vendimin e marrë në nëntor dhe pakënaqësinë e të punësuarve ta shprehin përmes protestave dhe formave të tjera të grevës.

“Me rritjen e pagës minimale dhe mungesës së dëgjimit të Qeverisë që gradualisht të rriten edhe pagat e tjera do të realizohet ajo që Sindikata e AOGJSH e parashikonte, ndërsa ajo është kolaps i sistemit të pagave në administratë dhe gjyqësor”, deklaroi dje kryetari i Sindikatës së Punëtorëve nga Administrata, Organet Gjyqësore dhe Shoqatat e Qytetarëve (AOGJSH), Trpe Deanovski.

Me vlerën e re të pagës minimale, thonë nga AOGJSH, Qeveria për herë të parë në historinë e Maqedonisë, do të bëjë një grup të tërë të të punësuarve në administratë të cilët deri më tani ishin pak mbi pagën minimale tani të marrin vetëm pagë minimale. Me vetë këtë, Qeveria i nënçmon të punësuarit e tyre, dhe e dyta e rrit përqindjen e të punësuarve të cilët marrin pagë minimale në nivel shtetëror prej 13,8 për qind në gati 18 për qind

“Ne kemi ardhur në këtë situatë, shtoi ai, për faktin se nga momenti i vendosjes së pagës minimale në vitin 2012 deri në rritjen e fundit të hënën paga minimale do të rritet për 120 për qind, ndërsa pagat në administratë dhe në drejtësi që nga viti 2012 u rritën për 9 ose 10 për qind. Gjithashtu, në vitet e fundit me politikat e Qeverisë në sektorë të caktuar të sektorit publik pagat janë rritur deri në 25 për qind, ndërsa pagat në administratë dhe në gjyqësor nuk janë rritur as edhe një herë”, theksoi Deanoski.

Një nga kërkesat kyçe të AOGJSH drejtuar Qeverisë është që së bashku me ndryshimin e Ligjit për Pagën Minimale në procedurë të shkurtuar të bëhen ndryshime në ligjet e veçanta që rregullojnë pagat e punonjësve në administratë dhe gjyqësor në mënyrë që vlera e minimumit të merret si bazë.

Kryeministri Dimitar Kovaçevski, tha, se rritja e pagave të cilat nuk janë pjesë e pagës minimale, është pjesë e marrëveshjes kolektive.

“Në disa sektorë tashmë kemi rritje të pagave. Kjo veçanërisht u bë në pjesën e shëndetësisë, në pjesën edukatorëve, ndërsa njëjtë kishim tentim për rritje të pagave në kuadrin mësimor, parashtruam ligj në Kuvend për transformimin e marrëdhënies së punës për 4.700 mësimdhënës nga kohë e caktuar në kohë të pacaktuar me çka ishte definuar edhe paga të rritet me koeficient në lidhje me pagën minimale”, tha Kovaçevski.

Nga VMRO-DPMNE opozitare vlerësojnë se rritja e pagës minimale pa rritje adekuate të pagave të tjera nuk do ta arrijë efektin e barazisë. Paralajmërojnë se përmes amendamenteve do të kërkojnë respektim dinjitoz të marrëveshjeve kolektive dhe koeficintëve të kompleksitetit të vendeve të punës.

Nga Lidhja e Sindikatave të Maqedonisë prej ku kërkuan rritje të pagës minimale në 18.000 denarë, por dhe harmonizim gradual të pagave të tjera në shtet, edhe dje përkujtuan se duhet të zbatohet neni 8 i Ligjit për Pagë Minimale dhe të respektohen marrëveshjet kolektive.

Edhe Sindikata e Pavarur Akademike (NAkS) dje e përshëndeti rritjen e pagës minimale. Ajo konsideron se ko do ta përmirësojë statusin e punëtorëve me paga më të ulëta dhe është në drejtim të përmirësimit të standardit të tyre jetësor. Por, edhe nga atje porosisin se rritja e pagës minimale duhet të reflektohet edhe në vlerën e pagave të tjera në sektorin publik, koeficienti i të cilit ka lidhje me pagën minimale, por edhe me pagën mesatare.

NAkS pret se metodologjia e ndryshuar për përllogaritje të pagës minimale do të respektohet, por de njëkohësisht do të respektohen edhe rregullat e tjera ligjore dhe marrëveshjet kolektive të cilat e rregullojnë këtë materie.

Sa i përket kërkesës së VMRO-DPMNE-së që të harmonizohen edhe pagat në sektorin publike, zëvendëskryeministri përgjegjës për Çështje Ekonomike, Bytyqi pardje tha se harmonizimi i pagave është pjesë e zgjidhjes ligjore dhe se harmonizimi do të bëhet sipas nenit 8.

“Të gjitha pagat duhet të harmonizohen me pagën minimale., Nuk ka ndarje në sektor publik dhe privat. Ligjet merren në bazë të parametrave të cilat duhet të mundësojnë barazi dhe drejtësi”, tha Bytyqi.

Tetëdhjetë mijë qytetarë do të marrin rrogë minimale prej 18.000 denarë në prill. Qeveria pardje i miratoi ndryshimet dhe plotësimet e Ligjit për Pagën Minimale në përputhje me vendimet e Këshillit Ekonomik – Social.

Me këto ndryshime me të cilat shuma më e vogël e pagës minimale duke filluar nga paga e marsit nuk mund të jetë më e vogël se 18.000 denarë, në kornizë ligjore janë vendosur dhe sjellë ndryshime për harmonizim të rregullt vjetor të pagës minimale me 50 për qind të rritjes vjetore të pagës mesatare dhe 50 për qind të rritjes së shpenzimeve për jetesë, si edhe kriteri sipas së cilit lartësia e pagës minimale nuk do të jetë më e ulët se 57% e pagës mesatare të publikuar sipas Entit Shtetëror për Statistikë, kumtoi shërbimi për shtyp i Qeverisë.

Të fundit