Ndërsa luftimet e ashpra vazhdojnë midis Izraelit dhe Hamasit në Rripin e Gazës, të dyja palët kanë negociuar prej disa kohësh për të shkëmbyer disa nga pengjet e kapur nga Hamasi në këmbim të një armëpushimi të shkurtër. BBC raporton se ka shenja përparimi në javët e negociatave indirekte të pengjeve, të cilat përfshijnë Shtetet e Bashkuara dhe Katarin si ndërmjetës.
Ambasadori i Izraelit në SHBA tha se kishte shpresë se një numër i konsiderueshëm pengjesh mund të lirohen në ditët në vijim në këmbim të një armëpushimi të shkurtër.
Kryeministri i Katarit Mohammed bin Abdulrahman Al Thani tha se përpjekjet për kthimin e pengjeve tani ishin të arritshme.
“Tani jam më i sigurt se jemi mjaft afër për të arritur një marrëveshje,” tha Mohammed bin Abdulrahman Al Thani, duke shtuar se vetëm detaje praktike “të vogla” mbetën të pazgjidhura.
Dhe zyrtari amerikan i sigurisë kombëtare, John Finner tha se negociatorët ishin “më afër se ne kemi qenë ndoshta në çdo moment që kur këto negociata filluan disa javë më parë.”
Megjithatë, mbrëmë kryeministri izraelit hodhi poshtë raportet për një marrëveshje të afërt.
“Nuk ka asnjë marrëveshje për momentin”, tha ai.
Ndërkohë, ushtria izraelite – nën presion për të justifikuar sulmin e saj në spitalin Al-Shifa në Gaza – publikoi dy video të reja. Një video tregon një tunel që të çon në një derë kundër shpërthimit, lloji që Hamasi përdor për qendrat e tij komanduese.
Një tjetër video e marrë nga kamerat e sigurisë thuhet se tregon dy pengje të Hamasit, një i plagosur, të cilët u dërguan në spital më 7 tetor. Ushtria izraelite pretendon se Hamasi vrau gjithashtu një ushtar izraelit në spital. BBC nuk mund të verifikojë në mënyrë të pavarur vërtetësinë e regjistrimeve.
Dhe ndërsa polemika rreth sulmit izraelit në spitalin Al-Shifa në Gaza vazhdon, tanket izraelite hynë në Spitalin Indonezian në Gazën veriore këtë mëngjes. Drejtori i spitalit Marwan Al-Sultan tha për BBC se ushtria izraelite ishte rreth 20 metra larg ndërtesës.
Më herët ai tha se dëgjoi të shtëna rreth e rrotull dhe se departamenti i kujdesit post-operativ u godit.
Drejtori i një spitali indonezian në Gazën veriore i tha BBC-së se të paktën 10 persona u vranë në sulmin ajror izraelit.
Ministria e Shëndetësisë e Hamasit në Gaza tha më vonë se 12 persona kishin vdekur. Dhjetra njerëz u plagosën në sulmin e fundit izraelit.
