Përfundoi hetimi për rastin “Perandoria”, të hapur nga ish-PSP-ja, konfirmojnë për “Fokus” nga Prokuroria për Ndjekjen e Krimit të Organizuar dhe Korrupsionit. Tashmë të dyshuarve, përfshirë ish-drejtorin e DSK-së, Sasho Mijalkov dhe biznesmenin Orce Kamçev, do t’u dorëzohen vendimet për hetim të përfunduar dhe do të kenë 15 ditë kohë për t’i dorëzuar provat e tyre në Prokurori, transmeton Portalb.mk.
“Lidhur me rastin “Perandoria”, ju njoftojmë se hetimi ka përfunduar, në ditët në vijim do t’iu dorëzohen njoftimet për përfundimin e tij të dyshuarve dhe mbrojtjes. Pason afati i paraparë me ligj prej 15 ditësh, në të cilin mbrojtja ka të drejtë të shqyrtojë provat e mbledhura dhe të propozojë provat e veta. Pas përfundimit të këtyre veprimeve procedurale do të merret vendimi i prokurorit publik”, thanë për Fokus nga Prokuroria.
Ditë më parë, Prokuroria Themelore Publike në Shkup kishte parashtruar gjashtë kërkesa në lidhje me sekuestrimin e pasurisë së përfshirë në lëndën “Perandoria”.
Pasuria e përfshirë në këtë lëndë u kërkua të ngrihet përkohësisht, pasi ishin plotësuar kërkesat sipas prokurorit të lëndës. Në lidhje me ngrirjen e këtyre pronave, janë njoftuar Regjistrimi Qendror dhe Agjencia për kadastër të patundshmërisë.
“Kërkesa vjen si rezultat i dyshimeve të bazuara se pasuria rrjedh nga vepra penale dhe deri në kryerjen e procedurës penale, do të jetë e sekuestruar ose do të pamundësohet shfrytëzimi i saj”, deklaruan nga Prokuroria.
Në bazë të rezultateve, Prokuroria vlerësoi që kjo pronë ishte bartur deri te personi i tretë me qëllim që të fshehët pronari i vërtetë.
Në bazë të kësaj, me propozim të PTHP dhe vendim të gjyqtarit u vendos ngrirja e pronës “Divelop Grup” – Shkup që është pronë e Hotel Grandit; 67.5 përqind e “Divelop Grup”-Shkup; 32.5 përqind e investimit aksionar të “Best Vej Investment” – Shkup në “Divelop Grup”-Shkup, pasuri e patundshme e “Biznis Properti Investment”-Shkup në vlerë prej 58 milionë denarë, banesa në me sipërfaqe 720 metra katror dhe garazhe me sipërfaqe 92 metra katror; letra me vlerë të “Eksiko” – Shkup në vlerë prej 21 milionë denarë dhe pasuri e patundshme në Sheshin Maqedonia rreth 566 metra katror në vlerë prej 1.7 milionë euro.
Orce Kamçev, përveç në lëndën “Perandoria”, është i dyshuar edhe në lëndën “Parcelat në Vodno“, për të cilën më 14 mars u burgos. Besohet se Kamçevi planifikoi edhe arratisjen nga vendi dhe se kjo është një nga arsyet pse u kthye në burgun e Shkupit.
I pakënaqur me vendimin e gjykatës, avokati Toni Menkinoski ngriti padi penale kundër gjyqtarit të procedurës paraprake dhe Këshillit penal në gjykatën penale të Shkupit, ndërsa u shkroi edhe ministrave për Punë të Jashtme të vendeve anëtare të Këshillit të Evropës.
Orce Kamçev përfundoi në paraburgim 30-ditor në 14 mars si një nga të dyshuarit në lëndën “Parcela në Vodno”. Ai apeloi masën e paraburgimit në këshillin penal, por ajo u refuzua.
Në hetimin e “Parcela në Vodno “, përveç Kamçevit, të dyshuar janë edhe ish-kryeministri Nikolla Gruevski, Sasho Mijalkov, kumbara i Gruevskit, Rusko Novaçevski, nëna e Kamçevit, Ratka Kamçeva. Rasti ka të bëjë me faktin se parcela tërheqëse toke në Vodno ishin blerë me para të anëtarësisë dhe donacionet e partisë për VMRO-DPMNE. Bëhet fjalë për 11.000 metra katrorë tokë dhe shumë prej 1.3 milionë euro. Kohët e fundit, si pjesë e hetimit, prokuroria kontrolloi edhe apartamente që lidhen me Gruevskin.
Në rastin “Perandoria” të dyshuar janë Jordan Kamçev, Sasho Mijallkov, Nenad Josifoviq, Cvetan Pandeleski, Ratka Kunoska – Kamçeva, Hristina Kamçeva – Stojçeska, Zorica Arsovski, Liljana Gajdovska, Vlladisllav Stajkoviq, Todor Mirçevski, Dejan Janev, Vançe Mijallçec dhe Jovançe Taskovski./Portalb
