Shoqata e prokurorëve publik dje mbajti Kuvendin zgjedhor në të cilin për anëtarë të Bordit Ekzekutiv të Shoqatës u zgjodhën Anita Topolova Isajlovska, Elvin Veli, Naum Panoski, Irina Trajkoska Strezoski, Stojanço Arnaudoski, Desa Paunovska, Bashkim Hiseni, Jelena Koleva Doagazanska, Violeta Milçovska, Katerina Kolareviq, Ana Gogovska Jakimovska, Spasenka Andonova dhe Katerina Paneva.
Siç informojnë sot nga Prokuroria Publike, nga anëtarët e Bordit Ekzekutiv, për kryetar të Shoqatës të prokurorëve publikë është zgjedhur Elvin Veli, prokuror publik në Prokurorinë e Lartë Publike Shkup. Nënkryetare u zgjodhën prokurorët publikë Spasenka Andonova dhe Irina Trajkoska Strezoski, ndërsa Ana Gogovska Jakimovska për sekretar të Shoqatës. Arkëtare u emërua Katerina Paneva.
“Në periudhën e ardhshme, autoritetet e reja të Shoqatës do të hartojnë një program vjetor në të cilin do të parashikohen më shumë aktivitete me qëllim të promovimit dhe forcimit të statusit të prokurorëve publikë dhe shërbimit profesional në prokurori, rritjes së bashkëpunimit me institucionet dhe Organizatat joqeveritare, si dhe pjesëmarrjen në projekte të ndërlidhura me rregulloret ligjore në sferën e gjyqësorit”, theksohet në kumtesën e Prokurorisë Publike.
