Rritja e madhe e kostove të energjisë elektrike e ka vënë ekonominë sllovake në rrezik kolapsi, ka thënë kryeministri Eduard Heger në një intervistë me Financial Times, duke thënë se nëse Sllovakia nuk merr ndihmë, ajo do të mbajë energji elektrike vetëm për kompanitë dhe qytetarët vendas.
Rritja e çmimeve të energjisë pas pushtimit rus të Ukrainës do të “vrasë” ekonominë nëse Sllovakia nuk merr miliarda euro ndihmë nga Brukseli, ka thënë kryeministri në një intervistë për FT.
Sllovakia prodhon shumë energji elektrike, kryesisht në termocentrale bërthamore dhe hidrocentrale, por prodhuesi më i madh i saj ua shiti tepricën tregtarëve në fillim të vitit, të cilët tani e rishesin atë energji elektrike në Sllovaki në kontrata të së ardhmes me çmime tregu, deri në pesë herë më të larta.
“Sllovakët blejnë për 500 euro atë që shitën për 100 euro”, ka thënë Heger për FT, duke shtuar se kjo është arsyeja pse plani i Komisionit Evropian për të taksuar fitimet shtesë të prodhuesve të energjisë elektrike nuk do të funksionojë në Sllovaki.
“Nëse duam një taksë mbi fitimin shtesë, duhet ta vendosim atë në nivel evropian”, ka thënë kryeministri sllovak.
Të ardhurat nga taksa evropiane duhet të shpërndahen në mënyrë të barabartë midis të gjithë anëtarëve të BE-së, gjë që do t’i sjellë Sllovakisë rreth 1.5 miliardë euro, vlerëson ai.
Ai gjithashtu beson se Brukseli duhet të lëshojë pesë miliardë euro fonde të papërdorura nga fondet e zhvillimit rajonal për të reduktuar faturat e energjisë në kompani.
“Përndryshe, kompanitë sllovake do të mbyllen dhe e gjithë ekonomia mund të bie”, shtoi Heger.
“Nëse Brukseli nuk na del në ndihmë, atëherë ne do të duhet të mbajmë energjinë elektrike për kompanitë dhe familjet tona në mënyrë që ato të mos falimentojnë. Ne nuk e duam këtë, por nëse nuk ka ndihmë tjetër, ne do të shtyhemi drejt asaj zgjidhjeje”, theksoi kryeministri sllovak.
Ai i bëri thirrje Brukselit që taksën mbi fitimet shtesë ta zgjerojë edhe tek ndërmjetësit, pra tregtarët e energjisë, të cilët fitojnë para edhe nga çmimet e larta.koha.net
