Në Haraçinë, ka shprehje shumë të shpeshta të dhunës kur kërkohet mbledhja e taksës së pronës dhe duhet të vendoset rregull dhe porosi, tha Kryeministri Zoran Zaev në paraqitjen e djeshme në TV Sitel . Sipas hulumtimit të OJQ-së Qendra për Komunikime Civile për mbledhjen e tatimit në pronë për 2017, 2018 dhe 2019, Komuna e Haraçinës nuk mbledh fare tatim në pronë, ndërsa shpjegimi është se nuk kanë bazë të të dhënave të tatimpaguesve e as departament të taksave, njofton Portalb.mk.
“Paguhet, por shumë pak. Atje ka shumë shpesh shprehje të dhunës kur bëhet fjalë për mbledhjen e taksës së pronës dhe duhet të vendoset rregull. Ajo është e ardhur burimore e komunës dhe duhet ta bëjë atë. Komuna e Haraçinës nuk është zhvilluar asnjëherë siç është zhvilluar që nga viti 2017. Por, do të them në thonjëza, me paratë e shtetit. Zgjidhen çështje historike, shkolla rinovohen, ndërtesa komunale u ndërtua, u ndërtua kanalizimi, rezervuari në një nga fshatrat e komunës, po bëhen rrugët, ndriçimi rrugor”, tha Zaev.
Lidhur me tatimin në pronë, Kryeministri thotë se është 2% e të ardhurave të komunave, por, siç tha ai, më i rëndësishëm është mesazhi që qytetarët duhet të paguajnë taksë që të ndërtohet infrastruktura e komunës. Ai gjithashtu tha se komunat rurale si Haraçina më vështirë e kanë ta mbledhin këtë taksë, ndryshe nga komunat urbane, ku, sipas tij, është më e lehtë për tu mbledhur.
“Por, iu bëj thirrje qytetarëve t’ua paguajnë taksat komunave, nuk janë shumë para, paguhen një herë në vit”, tha Zaev.
Ndryshe, sipas hulumtimit të Qendrës për Komunikime Civile, të ardhurat më të larta nga tatimi në pronë e ka Komuna Qendër, me rreth 2.3 milion euro në vit, dhe me më të ulëta, gjegjësisht pa të ardhura mbi këtë bazë është Komuna e Haraçinës e cila nuk mbledh taksë të tillë, me arsyetimin se nuk ka baza të të dhënave të tatimpaguesve dhe as nuk ka krijuar repart tatimor, për çka as nuk lëshon vendime tatimore. Vetëm dhjetë komunat e qytetit të Shkupit mbledhin gjysmën e të gjithë tatimit në pronë të mbledhur në nivelin shtetëror. Më të suksesshmit në mbledhjen e kësaj takse janë Rosomani dhe Resnja, më pak të suksesshëm, Studeniçani dhe Mavrova-Rostusha. Sipas rajoneve, përqindja më e lartë e mbledhjes së kësaj takse është në komunat e rajonit të Vardarit, dhe më e ulëta në rajonin e Pollogut.
