Maqedonia e Veriut zgjodhi presidenten grua, kurse koalicioni që udhëhiqej nga LSDM-ja pësoi disfatë historike. Çfarë do të thotë kjo për të ardhmen e vendit mbetet të shihet, por shqetësimet e bashkësisë ndërkombëtare janë se vendi mund të devijojë nga rruga evropiane nëse nuk i përmbush premtimet, shkruan “Zëri i Amerikës” në gjuhën maqedonase, duke analizuar rezultatin zgjedhor.

Ish-Ambasadori amerikan në Shkup, Philip Reeker, vlerëson se zgjerimi i BE-së s`ka alternativë dhe se kjo është e ardhmja e Maqedonisë së Veriut.

“Shoh momentin e vërtetë për zgjerimin, zëra të tilla vijnë nga Brukseli dhe nga kryeqendrat tjera evropiane, është koha që RMV-ja të lëviz përpara”, tha Philip Reeker, diplomat amerikan.

Analisti ballkanik, Edward Joseph, vlerëson se qeveri e re në Shkup duhet të dëshmojë lidership, duke marrë parasysh mbështetjen e madhe që mori gjatë zgjedhjeve.

“Do të ketë partner shqiptar në Qeveri. Me siguri do të jetë opozita VLEN. Ata do të kenë sfida, u obliguan të votojnë për ndryshimet kushtetuese. Çfarë do të ndodh nëse pas 6 muajsh nëse me VMRO- DPMNE-në në Qeveri nuk votohen ndryshimet kushtetuese? Çfarë do të ndodh në RMV? Çështja mbetet e hapur”, tha Edward Joseph , analist Ballkanik.

Drejtori për Evropën i Institutit Ndërkombëtar Republikan – IRI ka komentuar raportet e ardhshme Shkup – Sofje, duke marrë parasysh se në RMV vjen garnitura e re politike.

“Duhen koka të ftohura që dy vendet të lëvizin përpara, por edhe shumë diplomaci nga Brukseli dhe Uashingtoni, për të lehtësuar procesin që qëllimi përfundimtar të jetë RMV-ja të bëhet anëtare e BE-së”, tha Pol Mekarti, IRI.

Ish-Ambasadori i BE-së në Shkup, Ervan Fuere, ardhjen në pushtet të partisë me oreintim djathtist nuk e sheh si mundësi për ndikim më të madh të Moskës.

“Përparësi e qeverisë së re në Shkup, do të jetë se pas zgjedhjeve evropiane, do të ketë qeveri të reja djathtiste. VMRO- DPMNE-ja mund të ketë mbështetjen për argumentet e tyre kundër kërkesave bullgare në rrugën drejt BE-së”, tha Ervan Fuere, ish ambasador i BE-së në Shkup.

Nadja Muzikina nga NDI ka theksuar se pavarësisht se kush ka pushtetin, Maqedonia e Veriut duhet të respektojë marrëveshjet ndërkombëtare.

“Nuk besoj se kërcënohet Marrëveshja e Prespës me qeverinë e re në RMV dhe pres që VMRO- DPMNE-ja dhe Presidentja e re të mbeten në rrugën drejt BE-së. Rajoni kalon nëpër turbulenca dhe e domosdoshme është që faktori ndërkombëtar të fokusohet më tepër në Ballkanin Perëndimor”, tha Nadja Muzikina, NDI.
Analistët vlerësojnë se lëvizjet zgjedhore nga e majta në të djathtë në Maqedoninë e Veriut, janë nxitur nga revolta e votuesve për shkak të zhvillimit të ngadaltë ekonomik dhe korrupsionit të vazhdueshëm që sipas tyre ndikon në ngadalësimin e aderimit në BE.

Qëndrimi ynë për këtë çështje është i qartë. Nuk shoh se çfarë është kaq e tmerrshme që kemi një aneks të Marrëveshjes së Miqësisë dhe Fqinjësisë së Mirë me Bullgarinë, të kemi një aneks tjetër, në të cilin do të shohim se çfarë lloj parimesh përfaqësojmë dhe me çfarë do të dalim në ato bisedime. Siç është konceptuar tashmë e gjitha, ne nuk kemi ndërmend ta mbështesim.
Kështu deklaroi lideri i VMRO-DPMNE-së, Hristijan Mickoski, në emisionin “Samo Intervju”, duke iu përgjigjur pyetjes për ndryshimet kushtetuese, të cilat janë kusht për fillimin e negociatave ndërmjet vendit dhe Bashkimin Evropian, si dhe komentimin e asaj që shkruhet në programin parazgjedhor të koalicionit “Maqedonia juaj” se integrimi evropian duhet të arrihet përmes dialogut dhe përmbushjes së parimeve.
Sipas Mickoskit, qëndrimi i VMRO-së për këtë çështje është i qartë, por nëse Bullgaria nuk është e gatshme të lëvizë nga qëndrimet e saj, atëherë, siç tha ai, do të kthehen në përmbushjen e agjendës së brendshme, ndërsa do të presë deri sa të ketë ndonjë qeveri të re në Sofje.

“Ne nuk po hyjmë në këtë proces për gjimnastikë politike apo për të treguar se sa të fortë jemi. Ne thjesht nuk besojmë se ky është procesi i duhur. Që procesi të jetë real, duhet të kemi një plan të qartë nga ana tjetër” tha Mickoski.

I pyetur nëse e ka fjalën për Bashkimin Evropian apo Bullgarinë, Mickoski thotë se Bashkimi Evropian është ai që e udhëheq këtë proces, ndërsa Bullgaria është vetëm një pjesë e saj.

Afati për ankesat për zgjedhjet presidenciale dhe parlamentare deri tek Komisioni Shtetëror i Zgjedhjeve (KSHZ) përfundon në mbrëmje në ora 19:00, gjegjësisht 23:30. KSHZ-ja dje i shpalli rezultatet e para zyrtare të zgjedhjeve dhe deri në ora 19:00 në Kuvend duhet ta dorëzojë raportin për rezultatet e zgjedhjeve presidenciale, pas së cilës, sipas njoftimeve, kryetari i Kuvendit, Jovan Mitreski, për të dielën në mesditë do ta caktojë seancën parlamentare për inaugurimin e presidentes së sapozgjedhur të vendit.

Sipas rezultateve zgjedhore të votave 100% të numëruara, të shpallura mbrëmë nga KSHZ, Siljanovska Davkova ka marrë 561.001 vota, ndërsa kundërshtari i saj dhe presidenti aktual Stevo Pendarovski ka marrë 251.881 vota.

Koalicioni i udhëhequr nga VMRO-DPMNE-ja ka fituar më së shumti mandate parlamentare, 58, i ndjekur Frontit Europian me 19 mandate, Koalicioni i LSDM-së 18, koalicioni VLEN, 13, “E Majta”, gjashtë dhe Lëvizja “ZNAM” po ashtu gjashtë.

Universiteti i Evropës Juglindore ka hapur dyert për promovimin e ofertës akademike për gjithë studentët e ardhshëm nga vendi por edhe shtetet fqinje. Aktiviteti i sotëm i ditëve të hapura, fillimisht nisi me prezantimin e fakulteteve nëpër stande, ndërsa më vonë, edhe me vizita brenda kampusit të UEJL-së. Për dallim nga vitet e shkuara, sivjet, prezantimi i ofertave bëhet direkt nga studentët, të cilët janë edhe dëshmia kryesore e cilësisë së këtij institucioni, deklaroi rektori i UEJL-së Abdylmenaf Bexheti.

“Sivjet kemi edhe fakultetin e shtatë të shkencave teknike pas atij të gjashtit të shkencave mjekësore. Gjithë këta do i ofrojmë me programet e caktuara studimore, ofertat e reja akademike dhe risitë, përfshi edhe aspektet gjuhësore. Mbetemi pra universiteti i përkushtuar tre gjuhësor, me dominim dhe strukturë të stabilizuar studentësh. Nëse referohemi pesë-gjashtë vite më pas, shohim një strukturë multietnike, me dominim 70 për qind e studentëve që studiojnë në gjuhën shqipe, 20 për qind e studentëve në gjuhën angleze dhe rreth 10 për qind në gjuhën maqedone. Kjo strukturë, përfshi edhe studentët ndërkombëtar, shkon me tendencë më shumë me ofertat në gjuhën angleze”, deklaroi Abdylmenaf Bexheti, rektor i UEJL-së.

Janë kthyer çmimet e vjetra të polisave të sigurimit gjatë regjistrimit të automjeteve.

Komisioni për përgjegjësi të automjeteve dha rekomandim, ndërsa Qeveria miratoi vendimin për kthimin e çmimeve, pasi më 25 prill u shtrenjtuan për 15,4 për qind.

Kompanitë e sigurimeve prej ditës së djeshme kanë filluar zbatimin e vendimit, që tashmë është publikuar edhe në Gazetën Zyrtare.

Pasi u tërhoqën disa anëtarë dhe funksioarë partiakë në LSDM, mbrëmë vonë dorëheqje ka dhënë edhe nënkryetarja e LSDM-së, Sanja Llukarevska.
Dorëheqja e saj vjen pas dorëheqjeve të Fatmir Bytiqit, Pero Kostadinovit dhe Jovanka Trençevskës nga kreu i Forumit të Grave në LSDM.

“Qytetarë të nderuar, të nderuar socialdemokratë të mi. Rezultatet zgjedhore nuk sjellin në pikëpyetje sinqeritetin tonë si politikanë dhe sinqeritetin e fjalëve tona se e kemi kuptuar porosinë tuaj. Falemnderit për besimin e dhënë që të jem nënkryetare e LSDM-së”, ka shkruar mes tjerash Llukarevska në Facebook, duke njoftuar dorëheqjen e saj.

Zgjedhjet evropiane i zhvilluam në procese zgjedhore të lira, paqësore, të drejta dhe demokratike në të dy ciklet zgjedhore. Me këtë me të drejtë mund të vlerësoj se kemi kontribuar në sjelljen evropiane të vendit, i cili aspiron të jetë anëtar i BE-së, tha kryeministri teknik Talat Xhaferi në konferencën e sotme për media, përcjell Telegrafi Maqedoni.

Në konferencën për media ku iu referua punës së Qeverisë në 100 ditët e kaluara, ai theksoi se këto zgjedhje do të përmenden se si mund dhe duhet të bëhen në interes të qytetarëve dhe shtetit.

“U angazhova para qytetarëve se do të mundësojmë shprehjen e lirë të vullnetit të qytetarëve në zgjedhjet presidenciale dhe parlamentare. Ky është një obligim i besuar në përputhje me Kushtetutën dhe ligjet dhe unë si Kryeministër dhe Qeveria e kemi përmbushur në vazhdimësi. Fjalët e mia konfirmohen nga urimet dhe shprehjet e respektit të partnerëve tanë evropianë. Nëse me diçka vlerësohen kapacitetet evropiane dhe demokratike të një qeverie, atëherë janë zgjedhjet”, tha Xhaferi.

Ai shprehu mirënjohjen e tij për institucionet dhe qytetarët sepse, siç tha, kanë mbajtur përgjegjësitë e tyre dhe kanë kontribuar në përpjekjet e shtetit për të përparuar sipas vlerave evropiane.

Kreu i Lëvizjes Demokratike, Izet Mexhiti në intervistë për Radio Televizionin e Shqipërisë tha se nëse duam të kemi qeveri stabile, gjithëpërfshirëse, atëherë patjetër duhet të jetë dhe opsioni shqiptar në qeverinë e ardhshme.

Ai thotë se tashmë kanë nisur bisedimet për qeverinë e ardhshme, ndërkaq thekson se shqiptarët e Maqedoninë së Veriut nuk janë të kënaqur vetëm me simbolikë dhe se si rrjedhojë thotë se në qeverinë që VLEN pretendon të marrë pjesë, “qytetari do ta ndjejë dorën e ngrohtë të qeverisë”.

“Qeveri pa shqiptarët nuk mund të ketë. Por ne nuk pretendojmë të jemi në qeveri me çdo kusht. Ne mendojmë se nëse duam të kemi qeveri stabile, gjithëpërfshirëse, atëherë patjetër duhet të jetë dhe opsioni shqiptar në qeverinë e ardhshme. Qeveria e ardhshme do të ketë mbi 75 deputetë. Ajo do të jetë stabile, do të luftojë korrupsionin, do të luftojë për shtetin ligjor, do të jetë orientuar drejt integrimeve europiane, do të jetë e përkushtuar për zhvillimet ekonomike dhe jetesën e qytetarëve”, tha mes tjerash Mexhiti në intervistën për RTSH.

Nga Sektori për Punë të Brendshme në Tetovë njoftojnë se gjatë ditës së djeshme janë arrestuar dy shtetase të Kosovës, sipas njoftimit të policisë, është vërtetuar se të njëjtat kishin hyrë ilegalisht në Maqedoninë e Veriut.

“Më 09.05.2024 në orën 17.05 në rrugën e ,,Ilindenit” në Tetovë, efektivët e policisë nga SPB-Tetovë kanë arrestuar Xh.M.(48) dhe L.M.(18), të dyja nga Republika e Kosovës, për arsye se pas kontrollit të kryer është zbuluar se ata kishin hyrë në shtet në mënyrë të ilegale dhe se nuk e kishin raportuar qëndrimin e tyre në zonë. Ata po mbahen në stacionin policorë për procedurë të mëtejshme”, thonë nga SPB-Tetovë.

Konferencë e jashtëzakonshme e KSHZ-së. Nënkryetarja e këtij institucioni, Ditmire Shehu deklaroi se disa anëtarë të Komisioneve Zgjedhore nuk iu përmbahen rregullave të parapara me ligj, duke shkel kështu Kodin Zgjedhor.

“Disa anëtarë të Këshillave zgjedhor nuk iu përmbahen udhëzimit për votim për zgjedhjet presidenciale dhe parlamentare të ditës së sotme, apo 8 majit. Të nderuar anëtarë të Këshillave Zgjedhorë, ju lutemi që tu përmbaheni në përpikshmëri detyrave dhe obligimeve që dalin nga Kodi Zgjedhor dhe nga aktet nënligjore të KSHZ-së…Votuesi mund të paraqitet në vendvotim vetëm njëherë për të ushtruar të drejtën e tij të votës.

Në disa komuna kishim, shkelje, kemi dërguar vërejtje tek të njëjtat dhe shpresojmë se i njëjti gabim nuk do të përsëritet. Ka disa komuna ku është regjistruar shkelja e Kodit Zgjedhor”, tha Shehu.