Aston Villa është fituesja e trofeut të UEFA Europa Liga për vitin 2026, pas një triumfi spektakolar me rezultatin e pastër 3 me 0 përballë gjermanëve të Freiburg-ut. Ky sukses rikthen klubin nga Birmingami te triumfet e mëdha kontinentale për herë të parë që nga viti i largët 1982.
Në finalen e madhe të zhvilluar në stadiumin “Vodafone Park” të Stambollit, skuadra angleze tregoi një superioritet absolut gjatë gjithë 90 minutave, duke mos i dhënë asnjë hapësirë rivalëve të tyre.
Me këtë sukses të jashtëzakonshëm, trajneri Unai Emery shkruan një faqe të re në librat e historisë së futbollit botëror.
Ky është trofeu i pestë i Europa Ligës për teknikun spanjoll, një rekord absolut dhe i paarritshëm, i cili vjen pas tre titujve të njëpasnjëshëm me Sevillën dhe një triumfi me Villarreal-in.
Me këtë finale, që ishte e gjashta në karrierën e tij nga 17 të zhvilluara në epokën moderne, Emery bëhet gjithashtu trajneri i parë në histori që fiton një trofe europian me tre klube të ndryshme, duke konfirmuar statusin e tij si mbreti i padiskutueshëm i këtij kompeticioni.
Për Aston Villa-n, ky triumf magjik në brigjet e Bosforit i jep fund një pritjeje të gjatë prej 44 vitesh, që nga fitorja historike e Kupës Europiane në vitin 1982 kundër Bayern Munich.
Tashmë, një brez i ri lojtarësh dhe tifozësh shkruan kapitullin e vet të lavdisë, duke vendosur një tjetër trofe madhështor në vitrinën e “Villa Park”.
