Përfundoi kampionati 2025/2026 në Ligën Futbollistike Komunale të Tetovë, ku pas 22 xhirove, KF “Cetinska” nga Tetova, për të parën herë u shpall kampion dhe në sezonin e ardhshëm do të garojë në Ligën e Tretë.
Klubi i futbollit “Cetinska” nga Tetova, në sezonin e dytë të garave në Ligën Komunale të futbollit, ka shënuar suksesin historik pasi krahas titullit kampion njëherit janë kualifikuar edhe në Ligën e Tretë.
Ishte kjo arsyeja kryesore që ekipi së bashku me tifozët në ndeshjen e fundit kishin organizuar një festë për të shënuar këtë sukses të jashtëzakonshëm.
Për trajnerin Fatmir Memetin, ky sukses është rezultat i punës, përkushtimit dhe mbështetjes së të gjithë atyre që besuan në këtë projekt.
“Ishte një rrugëtim dyvjeçar, jo i lehtë pasi vitin e kaluar ishim në vendin e dytë, nënkampion, edhe pse ishte viti parë garues kurse sivjet mblodhëm forcën, treguam karakter sportiv dhe sot shpallemi kampion ku edhe festojmë titullin kampion të Ligës Komunale’’ deklaroi trajneri Fatmir Memeti
Pjesë e ekipit kampion ishte edhe ish- futbollisti i Shkëndijës, veterani Bashkim Arifi i cili ishte edhe ndihmës i trajnerit.
‘’Unë edhe si trajner edhe si lojtar kam pasur mundësi ta shijoj edhe publikun e ekipit tonë Cetinskës. Me shumë kënaqësi i falënderoj të gjithë që kanë marrë pjesë në këtë moment historik të klubit tonë’’ tha ndihmës trajneri dhe futbollisti Bashkim Arifi.
Skuadra e Cetinskës gjatë kampionatit ka regjistruar plot 101 gola, ndërsa ka pranuar vetëm 25. Njëri ndër golashënuesit më të mirë ishte Lorik Lika i cili thotë se ka shënuar golin e parë dhe të 100-in për klubin e tij.
‘’Jam shumë i lumtur që pikë së pari u inkuadruam në Ligën e tretë të futbollit të Maqedonisë. Jam shumë i lumtur që kam shënuar golin e parë pas themelimit të klubit dhe golin e fundit të 100-të’’ tha futbollisti Lorik Lika
Kujtojmë se Lagja e Cetinskës është një vatër futbolli që ndër vite ka nxjerrë shumë futbollistë cilësorë, emra që kanë lënë gjurmë me fanellën e Shkëndijës dhe ekipe tjera të futbollit vendor e më gjerë ./Tv Koha/
