Imazhi tradicional i familjes evropiane me shumë fëmijë po ndryshon me shpejtësi. Të dhënat më të fundit të Eurostat për vitin 2025 tregojnë ndryshime të thella demografike në Bashkimin Evropian: numri i familjeve me fëmijë është në rënie, ndërsa numri i personave që jetojnë vetëm ose si çifte pa fëmijë po rritet ndjeshëm.
Për më tepër, për familjet që kanë fëmijë, realiteti është gjithnjë e më shpesh që vetëm një prind mban barrën e plotë të rritjes dhe edukimit të tyre.
Vetëm një në katër familje ka fëmijë
Nga gjithsej 203.1 milionë familje në BE, gjatë vitit të kaluar vetëm 47.4 milionë, ose 23.4%, kishin fëmijë. Pjesa më e madhe e tyre janë çifte me fëmijë (14.7%), të ndjekura nga familje të tjera me fëmijë (5.6%) dhe prindër të vetëm (3.0%).
Ndërkohë, 76.6% e familjeve në BE janë pa fëmijë. Kjo kategori dominohet nga personat që jetojnë vetëm, të cilët përbëjnë 37.5% të të gjitha familjeve, ndërsa çiftet pa fëmijë përfaqësojnë 24.1%.
Trendi i dekadës së fundit (2016–2025) tregon qartë drejtimin demografik të Evropës:
- Numri i familjeve me një person është rritur me 19.2% (nga 63.9 në 76.1 milionë);
- Numri i çifteve pa fëmijë është rritur me 3.3%;
- Numri i çifteve me fëmijë është ulur me 6.3%.
Dallimet mes vendeve evropiane
Përqindja më e lartë e familjeve me fëmijë regjistrohet në Sllovaki (35.4%), Irlandë (30.8%) dhe Qipro (28.2%). Në anën tjetër, Finlanda ka përqindjen më të ulët, me vetëm 18.2% të familjeve që kanë fëmijë, e ndjekur nga Lituania (18.4%) dhe Gjermania (19.9%).
Sa i përket numrit të fëmijëve, gjysma e familjeve evropiane me fëmijë (50.2%) kanë vetëm një fëmijë, 37.6% kanë dy fëmijë, ndërsa vetëm 12.2% kanë tre ose më shumë fëmijë.
Familjet me një fëmijë janë më të zakonshme në Portugali (61.8%) dhe Bullgari (60.4%). Në të kundërt, në 14 nga 27 vendet e BE-së dominojnë familjet me dy ose më shumë fëmijë, me Suedinë (57.8%) dhe Holandën (57.6%) në krye të listës.
Maqedonia e Veriut mbi mesataren e BE-së
Eurostat mbledh të dhëna edhe për vendet kandidate për anëtarësim në BE. Sipas të dhënave, nga gjithsej 595.6 mijë familje në Maqedoninë e Veriut, 393.4 mijë ose 66.1% janë pa fëmijë, ndërsa 202.2 mijë ose 33.9% kanë fëmijë.
Krahasuar me mesataren e BE-së, ku vetëm 23.4% e familjeve kanë fëmijë, Maqedonia e Veriut ka një përqindje dukshëm më të lartë. Me 33.9%, vendi renditet pranë Sllovakisë (35.4%) dhe Irlandës (30.8%), që kryesojnë në nivel evropian.
Struktura e familjeve me fëmijë në vend është:
- 43.2% kanë një fëmijë (87.3 mijë familje);
- 43.4% kanë dy fëmijë (87.8 mijë familje);
- 13.4% kanë tre ose më shumë fëmijë (27.1 mijë familje).
Ndryshe nga BE-ja, ku dominojnë familjet me një fëmijë, në Maqedoninë e Veriut mbizotërojnë familjet me dy fëmijë.
Një në tetë familje mbështetet te një prind i vetëm
“Thënia se duhet një fshat i tërë për të rritur një fëmijë tingëllon bukur, por për shumë familje realiteti është se vetëm një i rritur mban të gjithë përgjegjësinë”, thekson Eurostat.
Gjatë vitit të kaluar në BE kishte rreth 6.1 milionë familje me një prind, që do të thotë se 12.9% e familjeve me fëmijë mbështeten vetëm te një i rritur.
Ky fenomen është më i përhapur në Estoni, ku 40.6% e familjeve me fëmijë janë me një prind, e ndjekur nga Lituania (32.7%) dhe Letonia (28.5%). Në anën tjetër, përqindjet më të ulëta regjistrohen në Sllovaki (3.1%), Greqi (3.8%) dhe Slloveni (4.0%).
Sipas të dhënave të Eurostat për vitin 2025, Maqedonia e Veriut bën pjesë ndër vendet me përqindjen më të ulët të familjeve me një prind, me vetëm 2.6%.
Statistikat tregojnë gjithashtu se barra e rritjes së fëmijëve bie kryesisht mbi gratë. Plot 81.6% e familjeve me një prind drejtohen nga nëna beqare, ndërsa vetëm 18.4% nga baballarë beqarë. Shumica e këtyre familjeve (60.1%) kanë vetëm një fëmijë.
