25/04/2024
8.7 C
Tetovo

Të tjera lajme

Enti Shtetëror i Statistikës, vetëm 3 shqiptarë në pozita udhëheqëse

Punësimet e shqiptarëve në pozitat udhëheqëse në Entin Shtetëror të Statistikave numërohen në gishta. Në fakt, nga 53 të punësuar shqiptarë në këtë Ent vetëm tre janë në pozita udhëheqëse. Me vendimin e fundit u avancua vetëm një shqiptar, ndërsa dy të tjerë ishin prej më herët. Në dy konkurset e fundit prej 55 të punësuarve, sipas balancuesit 11 vende u takojnë 11 shqiptarëve. Zv/drejtori i Entit të Statistikave thotë se nga këto punësime vetëm njëri është në pozitë udhëheqëse, ndërsa 10 të tjerët marrin vendime, ndërsa veçmë punojnë prej vite me kontrata në vepër në këtë institucion. Selami shpreh indinjatë nga tri ministritë ajo e Financave, Administratës dhe Sistemit Politik, të cilat nuk i dalin në krah për të bërë avancime.

“Për avancimet, të mos flasim! Kemi njerëz, të cilët punojnë nga 7-8 vite në të njëjtën pozitë pune pa asnjë avancim. Nga ana tjetër, kemi njerëz që i shohim si kuadër që mund të kryejnë punë të tjera, u kemi dhënë pozita si udhëheqës i njësisë rajonale të Shkupit, që për herë të parë udhëheq një shqiptar, ai e bënë atë punë, por vazhdon ta merr pagën siç i figuron në vendim si pozitë e këshilltarit të thjeshtë”, deklaroi Ilmi Selami, Zëvendësdrejtor i Entit të Statistikave.

Në Entin e Statistikave ka rreth 240 të punësuar, por disa prej tyre tani më po braktisin këto vende pune. Një grup i të punësuarëve shqiptarë, të cilët punojnë vite me radhe dhe nuk kanë marrë avancimet e duhura, kanë adresuar letër të hapur deri tek Zëvendëskryeministri parë, por akoma nuk kanë përgjigje. Revolta e tyre është alarm i fundit para se të heqin dorë nga puna dhe paga nënvlerësuese që u jepet.

“Edhe pse i kemi dërguar shkresë zëvendëskryeministrit Grubi, të regjistruar me numër arkivor para 20 dite, ai nuk gjeti as kohë e as vullnet ti përgjigjet kërkesave për takim. Meqë ata nuk kanë kohë të na dëgjojnë, ne po u drejtohemi mediave. Gjendja aktuale e të punësuarave shqiptar në Entin Shtetëror të Statistikave është larg bazës së përfaqësimit të drejtë dhe adekuat. Nga dy poste udhëheqëse, një udhëheqës Njësie dhe një udhëheqës Sektori me konkurs të jashtëm, asnjë shqiptar i pranuar. Nga 42 poste të rezervuara për udhëheqës Njësie, vetëm 1 shqiptar. Nga 9 sektor, asnjë shqiptar”, thuhet në letrën e hapur të të punësuarve.

Sipas kësaj letre, shqiptarët nëpër projekte të financuara nga fondet IPA dhe Buxheti shtetëror janë të përfaqësuar me vetëm 1%. Të pakënaqurit thonë se është hera e tretë që shkojnë nga mbi 30 të punësuar nga Enti në Bruksel lidhur me procesin e skriningut, por në mesin e tyre asnjë shqiptar. /Alsat.mk

Të fundit