kProblemi me qent endacak në Pollog vazhdon që të mos zgjidhet në nivel të rajonit.Deri më tani vetëm dy komuna kanë nënshkruar marrëveshje me operatorë që do të bëjnë trajtimin e qenve endacak, respektivisht komuna e Tetovës dhe e Tearcës. Por, ajo që mbetet si premtim në letër është strehimorja për qent endacak në nivel të rajonit, ku do të përfshiheshin të gjitha komuna e Pollogut. Edhe pse kjo problematikë është diskutuar në Qendrën e Rajonit të Pollogut megjithatë ende nuk ka asgjë konkrete për shkak se fillimisht edhe pse kishte një vendim që strehimorja të ndërtohet në territorin e komunës së Bërvenicës, megjithatë kjo nuk u pranua nga autoritetet e kësaj komune dhe më pas është sjellu vendim tjetër që e njejta të ndërtohet në territorin e komunës së Vrapçishtit. Kryetari i komunës së Gostivarit Valbon Limani është shprehur se komunat në mënyrë vetanake mundohen që të zbusin këtë problem me të cilin ballafaqohen jo vetëm komunat e Pollogut pro të gjithë komunat në nivel të shtetit.“Në takimin e fundit unë kam insistuar dhe kam biseduar edhe me kryetarin e komunës së Tetovës Bilall Kasami, me qëllim që dinamika e projektit, për një strehimore rajonale të përshpejtohet, lokacioni nuk kuadër të planifikimeve të rajonit planor të Pollogut është paraparë të jetë në komunën e Vrapçishtit.Ne, veçmë kemi iniciuar të shohim se deri ku janë procedurat për vendndodhjen e kësaj strehimore dhe besoj se në mbledhjen e ardhshme do të marrim një qëndrim pak më qartë për këtë strehimore rajonale” deklaroi kryetari i komunës së Gostivarit Valbon Limani.Ndërkaq, edhe komuna e Gostivarit kohëve të fundit është duke u përballur me këtë problem, pasi që gati se çdo ditë ka raste të denoncimit nga ana e qytetarëve për sulme dhe kafshime nga qent endacak. Kjo ka ngjallë edhe frikë tek qytetarët për qarkullim në rrugët e Gostivarit dhe jo vetëm. Me këtë rast, kryetari i komunës së Gostivarit Valbon Limani është shprehur se krahas zgjidhjes për ndërtimin e një strehimore në nivel të rajonit të Pollogut, paralelisht punohet që të rivendoset në funskion strehimorja e ndërtuar nga kjo komunë vite me parë ku trajtoheshin qent endacak. Sipas informacioneve të fundit nga komuna e Gostivarit, në vijim e sipër është thirrja për zgjedhjen operatorit që do të merret me trajtimin e qenve endacak në këtë komunë.Brenda dy jave pritet që të përfundojnë procedurat e tenderimit dhe të fillojë sërish trajtimi i qenve endacak në këtë komunë.
/TV KOHA/