Sot jemi mbledhur këtu për të shpallur fundin e një epoke improvizimesh dhe për të shënuar fillimin e një zgjidhjeje sistematike, të qëndrueshme dhe afatgjate për një nga sfidat më të mëdha të komunës sonë – higjienën komunale.
Pamjet e kontejnerëve të mbushur, mbeturinave të shpërndara dhe hapësirave publike të parregullta nuk duhet të jenë më pjesë e përditshmërisë së Çairit. Këto pamje jo vetëm që e dëmtojnë imazhin e komunës sonë, por ndikojnë drejtpërdrejt në cilësinë e jetës dhe shëndetin e secilit prej nesh, të fëmijëve tanë dhe më të moshuarve.
Prandaj, sot nuk jemi këtu për të folur për probleme. Problemet i dimë të gjithë dhe i jetojmë çdo ditë. Sot jemi këtu për të ofruar një plan të qartë, konkret dhe të realizueshëm. Një vizion që do ta transformojë Çairin në një komunë të pastër, të rregullt dhe moderne, ashtu siç e meritojmë të gjithë.
Strategjia jonë bazohet mbi tri shtylla kryesore:
SHTYLLA E PARË: MODERNIZIM DHE ZGJIDHJE PËRFUNDIMTARE – INSTALIM I KONTEJNERËVE NËNTOKËSORË Çairit i duhet një revolucion në menaxhimin e mbeturinave. Për këtë arsye, e shpallim projektin tonë kapital: “Çair pa mbeturina në rrugë”.
Ky projekt parasheh zëvendësimin e plotë të kontejnerëve ekzistues, shpesh herë jo funksional, me një sistem modern të kontejnerëve nëntokësorë në të gjithë territorin e komunës.
Angazhohemi për zëvendësimin e plotë të kontejnerëve ekzistues të mbeturinave me një sistem bashkëkohor të kontejnerëve nëntokësorë.Për këtë projekt kapital sigurojmë një buxhet prej 120.000.000 denarësh, me afat zbatimi prej 36 muajsh.
Çfarë fitojmë me këtë?
- Një mjedis të pastër dhe estetikisht të bukur: kontejnerët nëntokësorë eliminojnë ndotjen vizuale dhe lirojnë hapësirën publike, si trotuaret dhe vendparkimet.
- Fund erërave të pakëndshme: sistemi është hermetikisht i mbyllur dhe parandalon përfundimisht përhapjen e erërave të këqija, sidomos gjatë muajve të verës.
- Kapacitet dhe efikasitet më të madh: një kontejner nëntokësor zëvendëson pesë deri në gjashtë kontejnerë standard, që do të thotë operacione më efikase operacione të zbrazjes.
- Parandalim të shpërndarjes së mbeturinave: pamundësohet qasja e kafshëve dhe personave të paautorizuar te mbeturinat, duke i dhënë fund pamjeve të shëmtuara përreth kontejnerëve.
Ky nuk është një projekt për një të ardhme të largët, zbatimi do të fillojë menjëherë, me faza, duke nisur nga pikat më kritike të komunës.
SHTYLLA E DYTË: PARTNERITET STRATEGJIK ME QYTETIN E SHKUPIT DHE NP “HIGJIENA KOMUNALE”
Pastërtia e Çairit nuk është vetëm përgjegjësi e komunës. Ajo është një kujdes i përbashkët. Prandaj do të nisim dhe vendosim nivelin më të lartë të bashkëpunimit me Qytetin e Shkupit dhe ndërmarrjen publike “Higjiena Komunale”.
Çfarë do të thotë kjo konkretisht?
- Plan i përbashkët operativ: do të krijojmë një trup koordinues të përbashkët që do të përgatisë një plan dinamik pastrimi me detyrime të qarta. Nuk do të ketë më hedhje të përgjegjësisë.
- Rritje të shpeshtësisë së shërbimeve: do të sigurojmë grumbullim më të shpeshtë të mbeturinave, pastrim mekanik dhe manual të rregullt, si dhe larje të rrugëve kryesore dhe bulevardeve në Komunën e Çairit.
- Eko-ekipe mobile: do të vendosim ekipe mobile për ndërhyrje të shpejtë që do të reagojnë menjëherë ndaj raportimeve të qytetarëve për deponi ilegale ose sasi të mëdha mbeturinash.
Qëllimi ynë është i qartë: makineritë e “Higjienës Komunale” të jenë vazhdimisht të pranishme në terren, dhe jo vetëm para festave ose gjatë fushatave.
SHTYLLA E TRETË: ÇAIRI ËSHTË SHTËPIA JONË E PËRBASHKËT – RRITJE E VETËDIJES PUBLIKE Projektet më të bukura dhe bashkëpunimi më i mirë nuk do të kenë sukses nëse nuk e kuptojmë se pastërtia fillon nga secili prej nesh. Do të nisim fushata të gjëra edukative me moton “Rruga ime, shtëpia ime”. Do të bashkëpunojmë me shkollat, bashkësitë lokale dhe sektorin civil për të ndërtuar një kulturë të re të jetesës dhe raportit ndaj hapësirës publike.
Të nderuar,
Ky është plani ynë. Nuk është një listë dëshirash, por një strategji serioze dhe e menduar mirë, me hapa të qartë, afate dhe përgjegjësi. Ka ardhur koha që Çairi të marrë fytyrën që e meriton – fytyrën e një komune moderne, të pastër dhe evropiane.
Ne jemi të gatshëm të punojmë ditë e natë për ta realizuar këtë vizion.
Ftojmë qytetarët dhe institucionet të na bashkohen.
Së bashku do të krijojmë një Çair më të pastër, më të bukur dhe më të shëndetshëm për të gjithë ne dhe për gjeneratat që do të vijnë.
