Në periudhë një mujore, në territorin e Maqedonisë së Veriut kanë ndodhur 4 aksidente me autobusë, 3 prej të cilave pa pasoja në njerëz. Shfrytëzimi i transportit publik nuk është sigurt përderisa kompanitë transportuese shfrytëzojnë autobus të vjetër. Kështu thotë Rufat Huseini, drejtor i Inspektoratit Shtetërorë të Transportit sipas të cilit shkeljet që bëjnë kompanitë transportuese janë të shpeshta. Ai thotë se edhe përkundër numrit të vogël të inspektorëve në terren, kryhen shumë kontrolle për të detektuar parregullsitë. Si dukuri më të theksuar, Huseini e përmend stërmbushjen e autobusëve me udhëtarë, që e sheh si një kanosje mjaftë të rëndë ndaj sigurisë së udhëtarëve.

”Në Maqedoni në përgjithësi, të gjitha kompanitë kanë automjete shumë të vjetra të cilat janë kërcënim për sigurinë në komunikacion. Raste të tilla kemi zakonisht ditën e premte dhe të dielën, kur kthehen njerëzit nëpër shtëpi kemi lëvizje më të madhe. Kemi sanksionuar shumë kompani. Është e vërtetë që paraqiten udhëtarë, jo vetëm tek ju por edhe tek ne paraqiten me parashtresa të ndryshme për shkak se në relacionet më të gjata ka udhëtarë që qëndrojnë në këmbë. Janë marrë masa ndëshkuese kundër transportuesve të tillë”- tha Rufat Huseini nga Ministria për Transport, Sektori i Transportit.

Zëdhënësi i Ministrisë së Brendshme Toni Angellovski thotë se policia kryen kontrolle të shpeshta te mjetet transportuese dhe se është mjaft i madh numri i parregullsive që hasen.

”Gjatë vitit 2018 janë kontrolluar 3510 mjete transportuese ndërsa janë konstatuar 412 parregullsi, për çka janë larguar nga komunikacioni por edhe janë sanksionuar. Në vitin 2019, deri një ditë më parë, kemi kontrolluar 1153 autobusë, dhe janë konstatuar 178 parregullsi”- tha Toni Angellovski, zëdhënës i MPB-së.

Ekonomia e dobët rrit mundësinë e shkeljes së ligjeve dhe mos rregullimin e autobusëve. Kështu thotë Inxhinieri i Komunikacionit Elmir Mustafi i cili thotë se krahas dënimeve, duhet të ketë edhe subvencione për kompanitë që investojnë në autobusë të ri.

”Kontrollet duhet të shtohen, përveç dënimeve duhet të mendohet edhe në benificione për kompanitë të cilat marrin autobus të ri, më të sigurt dhe më ekologjik. Gjithmonë shoferët tentojnë që sa më shumë të marrin udhëtarë. Çmimi i ulët i transportit në krahasim me vendet evropiane është shkak që shpesh të shkelen rregullat”- theksoi Elmir Mustafai, inxhinier i komunikacionit.

Institucionet u bëjnë thirrje qytetarëve që të mos hezitojnë ta paraqesin çdo lloj parregullsie komunikacioni me qëllim që të rritet siguria në rrugë.

Më shumë se 25 mijë familje janë duke pritur miratimin e Ligjit për Mbrojtjen Sociale. Aktivistët për luftën kundër varfërisë i kanë bërë thirrje kreut të Kuvendit Talat Xhaferi që të vendosë ligjin në rendin e ditës. Përfitimet për këto familje do të ishin që në muaj të fitojnë nga 9 deri në 11 mijë denarë, nëse familja ka një fëmijë që shkon në shkollë. Për momentin këta njerëz jetojnë me më pak se 50 euro në muaj.

“z. Talat Xhaferi, e di se ju jeni të shqetësuar për gjendjen e parlamentarëve, se kur ata të përfundojnë me funksionin e tyre nuk do të futen në kontejnerë. Ne duam të themi se qytetarët tanë që kërkojnë ndihmën tonë, ata futen në kontejnerë dhe me të ardhurat që i marrin, janë të dënuar me to dhe nuk kanë të drejtë të marrin ndihmë sociale”- tha Zoran Bikovski, Platforma Maqedonase Kundër Varfërisë.

Aktivistët thonë se janë të vetëdijshëm se me Ligjin e ri, kategoritë e cenueshme të qytetarëve nuk do ta mposhtin varfërinë, por sigurisht se jeta e tyre do të lehtësohet shumë më tepër. Ata besojnë se me zgjidhjen ligjore shërbimet sociale do t’u mundësojnë qytetarëve të varfër të marrin pjesë në mënyrë aktive në tregun e punës.

” Pikërisht kjo reformë sociale duhet të japë siguri sociale, aktivizimin dhe përfshirjen e qytetarëve të përjashtuar nga socialja. Mjaft kishte premtime, është e nevojshme të realizimit të reformave sociale. Varfëria është e vetmja që i bashkon ata pavarësisht nga përkatësia etnike ose çdo lloj përkatësie tjetër”- pohoi Sashko Jovanov -Platforma Maqedonase Kundër Varfërisë.

Burimet nga grupi parlamentar i BDI-së për Alsat thonë se ligji nuk është në procedurë parlamentare, sepse integristët konsiderojnë se përmban mospërputhje dhe është ende në proces të përpunimit. Kur të pranohet forma përfundimtare, do t’iu dorëzohet deputetëve. Përndryshe, të dhënat e Platformës për luftë kundër varfërisë tregojnë se rreth gjysmë milion njerëz jetojnë nën kufirin e varfërisë. Një familje katër anëtarësh konsiderohet e varfër nëse gjatë vitit nuk kalon të ardhurat e përgjithshme prej 164 mijë denarëve. Individ i varfër është ai që e kalon ditën me më pak se 100 denarë për të gjitha nevojat.

Zëvendëskryeministri Hazbi Lika foli sot për shpërbërjen e Sekretariatit për Marrëveshjen e Ohrit. Ai tha se kjo nuk duhet të merret si një lojë ose si diçka e lehtë që mund të kapërcehet aty për aty. Lika tha se nuk e di kur e ka sjellë BDI-ja këtë vendim, por tha se është dashur të konsultohen të gjitha palët për të arritur një ligj sa më të mirë.

“Mendoj se nuk është koha për ta thënë një gjë të tillë por çështja është se duhet të njihen njerëzit dhe aktorët politik me realitete të caktuara. Unë dje bëra një reagim shumë objektiv sepse unë jam udhëheqës i një sektori që e bart këtë proces, dhe të ngrihet iniciativë për ta ndryshuar këtë sektor, unë e quaj të nevojshme që të pyetet edhe ky sektor, të merret në konsideratë dhe të bashkëpunohet për të hartuar një ligj i cili më mirë do t’i mbrojë interesat sepse jemi të vetëdijshëm që marrëveshja e Ohrit është një dokument i cili ende nuk është implementuar.

Një shembull konkret është përfaqësimi i drejtë dhe unë mendoj që kjo nuk duhet të merret si një lojë ose si diçka e lehtë që mund të kapërcehet aty për aty. Nuk kam ndonjë mendim konkret në lidhje me ligjin, ligji ndoshta mund të jetë më i mirë por mbase mund të bëhet edhe më i mirë, sepse kaluan diku 17 vjet prej kur është arritur ajo marrëveshje. Ne e dimë se afatet i ka pasur për 4 vjet të implementohet dhe nuk është implementuar deri më tani. Po flasim për implementim dhe po hyjmë në konflikte për një marrëveshje e cila është dashur të implementohet 4 vite pasi është arritur” – tha Lika.

Po e quani konflikt. Konflikt mes kujt?

“Nuk e them konflikt në kuptimin e parë të fjalës , por po e them si konflikt mendimesh, idesh”.

Zëvendëskryeministri Bujar Osmani sot tha se vendimin për transformimin e Sekretariatit në Ministri e ka sjellë vetë BDI-ja. Cili ka qenë zëri juaj në atë vendim të partisë?

“Nuk e di kur e ka sjellë BDI-ja këtë vendim, por e di që kjo është një nga pikat e Marrëveshjes së Tiranës, mirëpo sot kur po merret ky vendim për hartimin e ligjit, unë e quaj shumë të nevojshme dhe shumë të aryeshme që të konsultohen të gjitha palët për të arritur një ligj sa më të mirë”.

Si e komentoni mospjesëmarrjen e Ali Ahmetit pikërisht sot kur po shuhet Sekretariati të cilin ju e udhëhiqni?

“Unë nuk e di se cila është arsyeja e mospjesëmarrjes por e di se ky ligj për të cilin ne po diskutojmë është në Parlament dhe ndoshta ka nevojë atje për të dhënë mendimet e tij por manifestim është i përvjetshëm dhe nuk është viti i parë që nuk ka qenë, ka edhe vite të tjera që s’ka qenë, kur ka pasur mundësi të vijë, ka ardhur”.

A keni shpresa që ju ta udhëhiqni Ministrinë e ardhshme për Sisteme Politike dhe Marrëdhënie Ndëretnike?

“Jo nuk ka të bëjë me atë. Këto që po ndodhin sot nuk ka të bëjë me atë”.

Është diskutuar shumë mungesa juaj në seancat e qeverisë. A mund ta dimë aryen?

“Edhe kjo është një çështje që besoj se nuk duhet të bisedohet gjatë këtyre kohërave sepse jemi para një procesi zgjedhor dhe nuk dua që referimet e mia të bëhen pjesë e ndikimeve për këtë proces zgjedhor”.

Prokuroria Publike sot ka ngritur procedurë hetimore ndaj 7 personave lidhur me aksidentin fatal në Llaskarcë të Shkupit, ku nga aksidentimi i autobusit të kompanisë “Durmo Turs” humbën jetën 15 udhëtarë dhe 38 u plagosën. Mes të dyshuarve janë ndaluar pronari dhe shoferi i autobusit.

Sipas prokurorit të çështjes, Sasho Rajçev, në ditën e aksidentit më 13 shkurt shoferi ka drejtuar autobusn me shpejtësinë e palejuar prej 99 km/h.

“Për shkak të shpejtësisë së palejuar, shoferi ka humbur kontrollin ndaj autobusit, duke kaluar në korsinë tjetër dhe në fund ka fluturuar nga rruga. Ai nuk ka mundur ta ndalë autobusin për shkak të problemeve teknike, gjegjësisht frenave, që kanë funksionuar pjesërisht”, theksoi Rajçev. Sipas tij, autobusi nuk ka guxuar të lëviz me atë shpejtësi dhe se shpejtësia maksimale duhej të ishte deri në 80km/h. Prokuroria ka zbuluar manipulime me tahografin e autobusit, pasi që ai ishte kurdisur që të tregojë shpejtësi më të vogël. Për të gjithë të ndaluarit sot, Prokuroria kërkon masë paraburgimi.