Analiza preliminare e shtabit zgjedhor të socialdemokratëve ka treguar se pakënaqësitë e qytetarëve që janë reflektuar në rrethin e parë të zgjedhjeve presidenciale, kanë të bëjnë me disa zgjidhje kadrovike, sjellja e një pjese të partnerëve të koalicionit, para së gjithash BDI-së, inflacioni dhe mosbesimi në sistemin gjyqësor.

Këto, sipas liderit të LSDM-së, Dimitar Kovaçevski, kanë qenë arsyet, që kanë dënuar partinë më 24 prill.

“Duhet të mësohet nga gabimet e së kaluarës dhe të mos përsëriten. Ky dënim na u dha më 24 prill, por jo edhe idesë për Maqedoni Evropiane. Nuk do të pranoj kritika nga VMRO-DPMNE dhe Hristijan Mickoski, nxënësit të Nikola Gruevskit. Sabotimi i sërishëm I së ardhmes së vendit, nga Mickoski dhe kandidatja presidenciale Siljanovska, do të thotë se VMRO-ja nuk ka ndryshuar” – tha Dimitar Kovaçevski, LSDM.

Gjatë periudhës së kaluar, sipas Kovaçevskit, ka patur retorikë të rrezikshme, që mund të nxisin tensione ndëretnike. Ai u bëri thirrje qytetarëve që të parandalojnë këto tentative, duke e quajtur të papërgjegjshme sjelljen e VMRO-së dhe BDI-së.

“Dua t`u dërgoj mesazh Mickoskit, Ahmetit dhe Siljanovskës. Ndalni përplasjet, brohoritjet dhe kërcënimet që nuk i sjellin të mira vendit. Kemi detyrë morale ndaj jush dhe brezave të ardhshëm që “përplasemi” me ide dhe projekte e jo me kërcënime dhe frikësime” – tha Dimitar Kovaçevski, LSDM.

LSDM-ja është parti e fuqishme, sikurse në fitore ashtu edhe në disfata – tha Kovacevski duke u dërguar porosi oponentëve politik, por, sic tha, edhe atyre në mesin tonë, se nuk do të heqin dorë nga synimet për ta barë Maqdoninë vend evropian.

Përgjigjet e Lotarisë amerikane DV 2025 dalin këtë të shtunë, në orën 18:00, me orën shqiptare. Të gjithë ata që kanë aplikuar për lotarinë amerikane, mund të kontrollojnë rezultatet nëse janë shpallur fitues në faqen e llotarisë amerikane në linkun dvprogram.state.gov.

Pasi të ndodheni në uebfaqen e Departamentit të Shtetit, duhet të klikoni mbi butonin “check status” e më pas të vendosni kodin unik që u është dhënë në tetor kur keni bërë edhe aplikimin.

Ju duhet të keni kodin e konfirmimit për të kontrolluar përgjigjet e lotarisë amerikane. Emrat fitues nuk publikohen nëpër gazeta apo faqe interneti.

 Izet Mexhiti nga VLEN, në një konferencë për shtyp ka deklaruar se asnjë parti politike nuk e dëshiron bashkëpunimin me BDI-në. Mexhiti më tej tha se të gjitha kombinimet për formimin e qeverisë së re shkojnë në favor të VLEN-it.

“Ka më shumë kombinime dhe të gjitha kombinimet shkojnë në favor të VLEN-it dhe asnjë kombinim nuk shkon në favor të BDI-së, sepse asnjë tabor politik nuk e dëshiron BDI-në”, tha Mexhiti.

“Sa i takon ndryshimeve kushtetuese, shtoi se edhe Qeveria aktuale premtoi se do t’i realizojë ndryshimet kushtetuese, por nuk i realizoi. Është më mirë më pak me fol e më shumë me punu”, tha Mexhiti.

Kryetari i BDI Ali Ahmeti në kuadër të takimeve me qytetarë në fushatën parazgjedhore për zgjedhore parlamentare ka qëndruar edhe në Shipkovicë.

Para qytetarëve, Ahmeti tha se banorët e Shipkovicës e kanë ndarë bukën dhe kripën me UÇK-në.

Në vazhdim ju sjellim fjalimin e kryetarit të BDI, z. Ali Ahmeti:

Bukë, e kripë, e zemër, Shipkovica i ka nda me ne, me UÇK. Shipkovica u bë metropol i diplomacisë. Përfaqësuesi i NATO më tha se kishte vizituar dy qendra dhe kjo është e treta, kishte qenë në Beograd pastaj në Prishtinë dhe në Shipkovicë, ai e tha nuk e thash unë.

Më thotë Shipkovica ka qenë në qendër të vëmendjes të takimeve dhe vetëm malësia e din se ky teritor ka qenë i njohur në gjithë zyrat europiane dhe amerikane në kohë të vështira.

Kjo fushatë do të vendos për të ardhmen e të gjithë neve pavarësisht etniteteve, jemi në situatë që të gjithë duhet të bëjmë politika shkencore dhe të menduara mirë, ky Front që është ndërtuar ka 3 vjet që gradualisht punohet edhe investohet dhe unë jam krenar që puna e këtij Fronti ka nis që në 2001, Arben Xhaferi dhe Imer Imeri.

Në Dibër më janë falenderuar që jemi bërë bashkë të gjithë, ne dallime nuk kemi natyrshëm kemi ardh në këtë Front dhe këtu jemi gjithë bashkë, suksesi i 24 prillit është i gjithë juve dhe do doja që në emër të gjithë bashkëpunëtorëve, ju keni qenë ato të parët e digës, ju na keni bë krenar dhe ju lumtë.

Shpëtimi për ne është anëtarësimi në BE, këtu është zhvillimi dhe përparimi, forcohet paqja dhe stabiliteti dhe tregu, a do jetë më mirë një treg me 2 milionë apo me 500 milionë? Apo do rrimë të izoluar dhe me probleme me fqinjët, sigurisht që e ardhmja është që të aterojmë në BE ku është si kërkesë e 98% të shqiptarëve.

Dhe ne nuk kemi detyrim tjetër, a do të ndodhë, sigurisht që po, sepse është në të mirë për gjithë komunitetet tjera. Ndryshimi i Kushtetutës nuk i tjetërson maqedonasit, me ne kanë gjetur përkrahje për çështjet që kanë shqetësim, siç nuk u bë ndryshe as me MO, as me atë të Prespës e as nuk do bëhet ndryshe. Kusht pas 8 majit vettingu do jetë, sepse nuk do të falim askënd.

Ka deklarata nga më të ndryshmet, unë ju kam dërguar porosi se ne nuk bëjmë majtap në politikë, sot nuk është koha që të bëjmë shaka në fushatë, sot është koha të përcaktohemi me platforma sepse më 9 maj gjithë duhet të mendojmë, Qeverinë e bëjnë ata që kanë mbështetjen e popullit.

Prokuroria Themelore Publike në Shkup ka lëshuar urdhër për fillimin e procedurës hetuese kundër dy personave të dyshuar për grabitje dhe heqje të paligjshme të lirisë. Ata akuzohen se më 23 prill, në një incident në rrugën “Belasica”, kanë përjashtuar një person nga liria e tij, duke e detyruar të futet në një automjet dhe më pas e kanë sulmuar fizikisht duke i shkaktuar lëndime të rënda.

Në veprimtarinë e tyre kriminale, ata dyshohet se kanë përdorur dhunë fizike dhe kërcënime për të detyruar viktimën të japë paratë. Sipas informacioneve, ata i kanë marrë rreth 8.000 denarë dhe më pas e kanë kërcënuar që të paguajë 10.000 euro deri më 1 maj, në rast se nuk dëshironin të vuajnë pasojat.

Prokuroria ka kërkuar nga Gjykata Themelore Penale në Shkup caktimin e masës së paraburgimit për dy të dyshuarit, ndërsa njëri prej tyre është aktualisht në arrati. Hetimi është në proces dhe organet e drejtësisë po punojnë për të zbardhur të gjitha detajet e këtij ngjarjeje të rëndë kriminale.

Në raundin e dytë të zgjedhjeve presidenciale dhe parlamentare më 8 maj janë akredituar gjithsej 1.999 vëzhgues, përkthyes dhe gazetarë të huaj.

Më shumë vëzhgues të akredituar janë vendorë – 1078. Zgjedhjet do të monitorohen nga 770 vëzhgues të huaj për nevojat e të cilëve janë angazhuar 85 përkthyes.

Për raportim të zgjedhjeve sipas të dhënave të Komisionit Shtetëror të Zgjedhjeve (KSHZ), janë akredituar 66 gazetarë të huaj.

Sipas të dhënave të Komisionit Shtetëror të Zgjedhjeve, një total prej 1078 vëzhguesish vendorë janë të akredituar për të mbikëqyrur zgjedhjet, me organizatat vendase “VAKE UP” dhe Fondacioni Rom për Demokraci duke zënë vendin e parë me numrin më të madh të vëzhguesve të akredituar.

Arben Taravari nga koalicioni VLEN më anë të një postim në facebook ka theksuar se se Qeveria e ardhshme do të bazohet në meritokraci.

 “JA VLEN sepse Meritokracia do të jetë njëra nga Kriteret bazë pas Fitores!”, ka shkruar Taravari.

Kush kë do të përkrahë dhe ku do të shkojnë votat në raundin e dytë të zgjedhjeve presidenciale të kandidatëve që nuk hynë në raundin e dytë?

Tani për tani asnjë parti nuk është prononcuar nëse do t’i thërrasë votuesit e saj për të përkrahur Pendarovskin ose Siljanovskën. VMRO-DPMNE publikisht u ankua se deri më tani nuk kanë marrë përkrahje për Gordana Siljanovska Davkova prej asnjërit nga kandidatët e opozitës. “Deri më sot nuk kemi përkrahje për Gordana Siljanovska Davkovën nga kandidatët e opozitës. Kjo do të thotë se ose nuk kanë ndjenjë elementare për shtetin ose në mënyrë të pavetëdijshme punojnë për pushtetin”, thekson Aleksandar Nikolloski nënkryetar i VMRO-DPMNE-së.

Kandidati për president nga rradhët e LSDM-së Stevo Pendarovski ka thënë se ai nuk do t’i kërkojë votat e kandidatëve të tjerë. “Nuk mendoj që t’u drejtohem subjekteve të tjera politike, sidomos atyre që kishin kandidatë, të cilët nuk kaluan në raundin e dytë. Unë nuk e parapëlqej këtë matematikë dhe këtë mënyrë të shpërndarjes prej teje tek unë”, është shprehur Pendarovski.

Por pikërisht votat e partive shqiptare do të vendosin në raundin e dytë të zgjedhjeve presidenciale, kësaj herë më së shumti për plotësimin e censusit prej 40%. Tani për tani edhe nga VLEN edhe nga BDI thonë se organet partiake ende nuk kanë sjellë vendim se cilin kandidat presidencial do ta përkrahin në raundin e dytë.

Kanë filluar përllogaritjet se kush do të jetë në qeverinë e re

Sa i përket fushatës për zgjedhjet parlamentare, partitë politike tri ditë para përfundimit të fushatës janë fokusuar se kush do të jetë pjesë e qeverisë së ardhshme. Bilall Kasami nga koalicioni opozitar shqiptar VLEN vlerëson, se ky koalicion ka legjitimitetin e votuesve shqiptarë prandaj dhe duhet të jetë pjesë e qeverisë së ardhëshme.

“Besojmë fuqishëm që pas 8 majit, koalicioni VLEN si pjesë e qeverisë do të jetë në shërbim të qytetarëve dhe në shërbim të bizneseve me qëllim të ndaljes së ekzodit të rinisë dhe qytetarëve drejt perëndimit”, ka thënë Bilall Kasami nga  VLEN.

BDI vlerëson se i plotëson të gjitha kushtet për të qenë në qeveri

Bujar Osmani nga Fronti Evropian është i mendimit se gjatë formimit të një qeverie duhet pasur parasysh se përveç shumicës prej 61 deputetësh nevojitet edhe shumica e Badinterit. Pa këtë shumicë të dyfishtë nuk mund të formohet qeveri stabile dhe nuk mund të ketë parlament funksional.

“Fronti Evropian përpos që garanton stabilitet dhe bashkëjetesë, ky koalicion do të sigurojë edhe dy kushtet elementare për formimin e qeverisë së ardhëshme, shumicën prej 61 deputetësh dhe shumicën e Badenterit”, ka deklaruar Bujar osmani nga BDI.

VMRO-DPMNE: Koalicionin qeveritar do ta formojmë me VLEN-in

VMRO DPMNE-ja e ka shpallur veten si fituese të këtyre zgjedhjeve, madje ka përcaktuar edhe partitë që do të jenë pjesë e qeverisë së re. Kreu i opozitës maqedonase Hristijan Mickoski ka thënë se partia që ai drejton do të jetë fituese e dyfishtë e zgjedhjeve më 8 maj. Sipas tij, qeveria e re do të formohet nga VMRO-DPMNE-ja dhe koalicioni VLEN që përbëhet nga partitë opozitare shqiptare.

“Për VMRO-DPMNE-në qëndrimet janë shumë të qarta. Nuk dua të flas me emisarët që BDI i dërgon çdo ditë për koalicion me VMRO-DPMNE-në. BDI-ja për mua është kapitull i përfunduar dhe do të shkojë në opozitë”, ka deklaruar Mickoski.

Në Maqedoninë e Veriut deri në vitin 2017 ka pasur një rregull të pashkruar, që qeveritë formohen nga partitë fituese shqiptare dhe maqedonase, pavarësisht orientimeve të tyre programore.

Gir: Procesi i zgjedhjeve të përfundojë me porosi dhe ndjenjë pozitive

Ambasadori i BE-së në Shkup, Dejvid Gir pret që raundi i dytë i zgjedhjeve presidenciale dhe votimi për parlamentaret të kalojë qetë dhe në atmosferë demokratike. “Misioni i OSBE/ODIHR-it e publikoi raportin për raundin e parë të zgjedhjeve. Zgjedhjet kaluan kryesisht qetë dhe në atmosferë demokratike dhe me të vërtetë shpresojmë se raundi i dytë i zgjedhjeve presidenciale dhe fushata për zgjedhjet parlamentare do të jetë pozitive, çka do të mundësojë që i gjithë procesi të përfundojë me porosi dhe ndjenjë pozitive”, ka deklaruar Dejvid Gir, ambasador i BE-së.

Të mërkurën me 8 maj, qytetarët e Maqedonisë së Veriut do të votojnë në raundin e dytë për zgjedhjet presidenciale dhe njëherazi edhe për zgjedhjet parlamentare./ DW

 Rrjeti telemetrik sizmologjik i Republikës së Maqedonisë së Veriut, në stacionet sizmologjike të instaluara në të gjithë territorin tonë, i mirëmbajtur nga Observatori Sizmologjik pranë Fakultetit Shkencë-Matematikor në Shkup, pas mesnatës së datës 04.05.2024 në ora 01:39, ka regjistruar një tërmet epiqendra e të cilit i përket zonës së epiqendrës së Shkupit, me magnitudë lokale të Rihterit ML 1.9.

Sipas të dhënave të deritanishme që disponon observatori, tërmeti është ndjerë nga popullata e qytetit të Shkupit dhe rrethinës, me intensitet III gradë sipas shkallës makrosizmike evropiane.

Të rinjtë, të cilët janë pjesë e partive politike që janë futur në garë për zgjedhjet parlamentare që do të mbahen më 8 maj, thonë se janë të lodhur nga frazat se gjërat nuk ndryshojnë në Maqedoninë e Veriut. Për këtë arsye, ata thonë se janë inkuadruar në to, që në mënyrë të drejtpërdrejtë të ndikojnë në vendimmarrje kur bëhet fjalë për interesat e tyre.

Drejtuesit e forumeve rinore brenda katër forcave kryesore politike, Lidhjes Social Demokrate(LSDM), Frontit Evropian të udhëhequr nga Bashkimi Demokratik për Integrim (BDI), koalicioni i partive shqiptare në opozitë VLEN, dhe VMRO DPMNE-ja thonë për Radion Evropa e Lirë se angazhimi i tyre në politikë si prioritet ka ngritjen e cilësisë së jetesës që të rinjtë mos largohen nga vendi.

Por, ata kanë edhe ide inovative, si angazhimi i psikologëve sipas modelit të mjekëve familjarë për çdo të ri, krijimi i zonave ekonomike për bizneset e të rinjve etj.

Jetmir Asani nga Lidhja Demokratike që është pjesë e koalicionit të partive politike shqiptare në opozitë, VLEN, thotë se synim ka hapjen e zonave të lira ekonomike për “start up” kompanitë, që do të drejtohen nga të rinjtë në mënyrë që ata të inkurajohen që me njohuritë e tyre të zhvillojnë biznese në Maqedoninë e Veriut dhe jo jashtë vendit.

“Do të angazhohemi që të rinjtë ta kenë më të lehtë të merren me biznes dhe këtë do ta realizojmë përmes krijimit të zonave të lira ekonomike me shumë lehtësime për të rinjtë që do të merren me biznes”, thotë Asani për Radion Evropa e Lirë(REL).

Në programin për zgjedhjet parlamentare të koalicionit VLEN, për sa i përket të rinjve veç tjerash theksohet se “personat më të rinj se 30 vjeç që hapin biznes në Maqedoninë e Veriut për tre vjet do të lirohen tërësisht nga taksat për realizimin e veprimtarive ekonomike”.

Në programin zgjedhor të koalicionit VLEN është apostrofuar dhe sigurimi linjave kreditore pa normë interesi për blerjen e banesave për çiftet e reja nën moshën 35-vjeçare.

“Kredi me zero interes për banim për çiftet e reja”, theksohet në programin zgjedhor të këtij koalicioni.

Jetmir Asani thekson se në fokus të koalicionit të partive shqiptare në opozitë mbetet dhe heqja e taksës së pagesës për studentët në universitete, gjegjësisht studime tërësisht pa pagesë.

Nga ana tjetër, Marko Mihallovski që drejton forcat e të rinjve te socialdemokratë thotë se prioritet mbetet themelimi i një ministrie për të rinjtë, ndërtimi i një sistemi për mbështetje sociale të të rinjve, si dhe promovimi i rëndësisë që ka shëndeti mendor përkatësisht sigurimi i psikologëve sipas modelit të mjekëve amë.

“Ngritja e standardit jetësor dhe konvikteve për studentët do të jetë angazhimi ynë primar. Do theksuar se këtë e kanë premtuar shumë parti politike përfshirë këtu dhe partinë që përfaqësoj se do të rinovojmë dhe ndërtojmë konvikte të reja, që disi nuk ia dolën. Tani kjo çështje do të jetë në fokus tonin”, thekson Mihajllovski për REL-in.

Në programin zgjedhor të Lidhjes Social Demokrate theksohet se kjo parti do të angazhohet për zhvillimin e softuerit “Youth job – E-Youth job” , nëpërmjet të cilit të rinjtë, gjegjësisht studentët dhe nxënësit e shkollave të mesme do të mund të përfitojnë njohuri për t’u bërë më konkurrues në tregun e punës me këtë dhe krijojnë pavarësi ekonomike.

Në programin e zgjedhjeve parlamentare të socialdemokratëve gjithashtu theksohet se “do të angazhohen për zhvillimin e mekanizmave që të rinjtë ta kenë më të lehtë të jenë pjesë e aktivitetet politike dhe pozitave drejtuese”.

Ndërkaq, nga Koalicioni i Frontit Evropian që udhëhiqet nga Bashkimi Demokratik për Integrim thonë për REL-in se fokusi do të vendoset në përfshirjen e të rinjve në vendimmarrje.

Në programin zgjedhor 2024 të Frontit Evropian, për sa i përket të rinjve, theksohet “nxitja e sipërmarrjes te të rinjtë, si mundësi për ngritjen e cilësisë së jetesës dhe pavarësisë ekonomike në një moshë më të re. Në programin zgjedhor theksohet dhe hartimi i një strategjie për kthimin e të rinjve në vendlindje dhe shfrytëzimin e njohurive të tyre në vend”.

Sergej Popov nga VMRO DPMNE-ja për Radion Evropa e Lire thotë se me prioritet mbetet ndarja e 50 milionë eurove nga buxheti për ndarjen e bursave dhe ndihmave financiare për studentët dhe nxënësit e shkollave të mesme.

Popov thotë se do të angazhohet dhe për sigurimin e kartelave ku të rinjtë do të kenë zbritje për produkte dhe shërbime të caktuara.

“Kemi një program përmbajtjesor të hartuar nga të rinjtë për të rinjtë që më vete përfshin interesat edhe të atyre që jetojnë këtu, po edhe atyre që duhet motivuar për t’u kthyer në vend”, thekson Popov.

Në programin zgjedhor të partisë maqedonase, VMRO DPMNE, theksohet se do të angazhohen që të zhvillohen viset rurale duke vënë theksin në zhvillimin e bujqësisë, përkatësisht do të ofrohen subvencione për çiftet e reja që do të shpërngulen e të kthehen në fshatra.

“Për të mbajtur popullsinë që jeton në zonat rurale, veçanërisht të rinjtë, parashikojmë investime sistematike dhe strukturore në infrastrukturë dhe vende të reja pune në zonat rurale”, theksohet në programin zgjedhor të VMRO DPMNE-së.

Edhe kundrejt ofertave të këtilla të partive politike, më shumë se gjysma e të rinjve nën moshën 29 vjeç të ardhmen e shohin jashtë vendit.Burimi: Radio Evropa e Lirë