Qeveria duhet të marrë sot vendim për uljen e çmimeve të pijeve. Deri në fund të javës pritet të përfundojë analiza me masat e qeverisë për përfshirjen e produkteve higjienike. Për mosprespektim të vendimit për çmimet e garantuara për disa produkte ushqimore, i cili ka hyrë në fuqi që nga java e kaluar, Inspektorati Shtetëror i Tregut (IShT) tashmë ka mbyllur disa markete.
Siç njoftoi ministri i Ekonomisë Kreshnik Beksheti, sot do të ketë vendim për uljen e çmimeve të pijeve joalkoolike dhe alkoolike.
“Për produktet higjienike, të gjitha konsultimet me gjasë do të përfundojnë gjatë kësaj jave dhe do të shohim nëse ka hapësirë për marrjen e masave të caktuara”, tha dje Bekteshi, i cili së bashku me kryeministrin Dimitar Kovaçevski vizituan kompaninë “Alma-M” në Vizbeg.
Me masën e re të Qeverisë, çmimi i mbi 50 produkteve në 24 kategori nga industria e furrës, qumështit, mishit është ulur me 10 për qind krahasuar me çmimin që kishin më 1 gusht.
“Në kategori dhe produkte të caktuara tashmë ka ulje të produkteve mbi 10 për qind, e në disa ulja është nga 30 në 40 për qind. Në markete këto produkte tashmë kanë marrë etiketën “çmim i garantuar”. Me këtë masë bashkë dhe në mënyrë solidare, u japim përkrahje qytetarëve tanë”, tha Kovaçevski.
Muajin e ardhshëm, siç bëri të ditur kryeministri, do të bëhen analizat për paketën e nëntë të masave antikrizë, e cila do t’i drejtohet kategorive vulnerabël të qytetarëve dhe të gjithë atyre që nuk fitojnë të ardhura shtesë në kohë krize.
Me Vendimin e fundit të Qeverisë, shitësve me pakicë u ndalohet të ofrojnë shitje aksionale (aksion) dhe shitje promocionale (promocion) gjatë shitjes së produkteve bujqësore dhe ushqimore. Ndalimi do të jetë i vlefshëm deri më 30 nëntor 2023.
Në të njëjtën kohë, u vendos që çmimet në tregtinë me pakicë, të cilat janë ulur për shkak të skadimit të afatit të produkteve bujqësore dhe ushqimore, të mos konsiderohen si shitje promocionale (promocion).
Më 1 korrik përfundoi masa për marzhet e ngrira për produktet ushqimore bazë – bukë, sheqer, vezë dhe produkte të qumështit. Me këtë lëvizje, shteti ia lë në dorë prodhuesve dhe tregtarëve që t’i përcaktojnë vetë çmimet sipas kushteve të tregut. Të gjitha të rezervuara për vlerësimet e rritjes ose rënies së çmimeve.
