Në kuadër të aktiviteteve të vitit jubilar, Rektori i Universitetit të Tetovës, Prof. Dr. Jusuf Zejneli së bashku me Kryetarin e Senatit, Prof. Dr. Vullnet Ameti, Prorektorin për Arsim Prof. Dr. Ibrahim Neziri, Prorektorin për Shkencë, Prof. Dr. Agon Memeti, drejtoreshën e Parkut Teknologjik Artina Kamberi dhe shefen e kabinetit të Rektorit Valmisa Novi, gjatë vizitës në SHBA, realizuan takim me ish-kongresistin amerikan, Joseph DioGuardi dhe bashkëshorten e tij Shirley Cloyes DioGuardi si dhe përfaqësues të tjerë të Ligës Qytetare Shqiptaro-Amerikane.
Emrat e çiftit DioGuardi janë të lidhur ngushtë me historinë e themelimit të UT-së, e cila është shoqëruar me përpjekje, mund, dhimbje dhe sakrifica të shumta, një rast specifik në historinë e arsimit të lartë, jo vetëm në hapësirën shqiptare, por edhe më gjerë. Ne i kujtojmë dhe i nderojmë të gjitha kontributet e së kaluarës të cilat janë shënuar në fletët e përjetshme të Universitetit të Tetovës.
Gjatë takimit u bisedua pikërisht për periudhën e shkurtit të vitit 1995, për peripecitë e përjetuara për ta bërë Universitetin e Tetovës realitet, si një pikë kyçe në historinë e shqiptarëve në përgjithësi, e sidomos për shqiptarët e Maqedonisë së Veriut në veçanti.
