25/04/2024
7.2 C
Tetovo

Të tjera lajme

Gjysma e nxënësve të shkollave të mesme në RMV janë viktima të bullizmit kibernetik, nuk e denoncojnë sepse kanë frikë

Dhuna kibernetike prek 50 përqind të nxënësve të shkollave të mesme në Maqedoninë e Veriut, ndërsa gjysma e tyre nuk e kanë denoncuar të njëjtën për shkak të frikës. Më shumë se 39 përqind e të anketuarve janë përballur me dhunë kibernetike më shumë se dy herë, transmeton Portalb.mk.

Shumica e nxënësve, pra 65,5 përqind, deklarojnë se kanë nevojë për edukim plotësues për sigurinë kibernetike, sepse mendojnë se nuk kanë njohuri të mjaftueshme për mbrojtjen nga sulmet e hakerëve dhe zbulimin e të dhënave personale.

Këtë e nxori në pah raporti me titull “Digjitalizimi dhe siguria kibernetike, e tashmja dhe e ardhmja e nxënësve”, i cili është përgatitur nga Analytica think-tank.

Tamara Mijoviq Spasova, drejtoresha ekzekutive e Analytica-s, hapi evenimentin e djeshëm duke theksuar se jeta sociale e të rinjve është bartur në rrjetet sociale, por ata në masë të madhe nuk janë të vetëdijshëm për rreziqet e internetit si bullizmi kibernetik, shkëmbimi i të dhënave private, si dhe se përmbajtja e publikuar një herë në internet mbetet përgjithmonë në hapësirën kibernetike. Hulumtimi është bërë vitin e kaluar në gusht mbi një mostër përfaqësuese prej 313 nxënësve nga tri shkolla të qytetit të Shkupit.

“Projekti i bullizmit kibernetik është i veçantë për faktin se përmes tij janë trajnuar drejtpërdrejt 50 nxënës dhe 15 profesorë me teknika dhe aftësi për përdorim të sigurt të internetit dhe teknologjive të tjera digjitale. Për shkollat, mbështetja nga kryetarët e komunave dhe nismat e tyre që synojnë luftimin e dhunës kibernetike janë me rëndësi kyçe për mbrojtjen e rinisë tonë. Nëse duam të bëjmë progres real në këtë, punëtoritë e vazhdueshme, trajnimet për njohjen dhe mbrojtjen nga sulmet kibernetike janë thelbësore”, deklaroi Spasova.

Duke pasur parasysh se dhuna e bashkëmoshatarëve fillon në shkollat ​​fillore, Analytica ka publikuar një udhëzues për sigurinë kibernetike të dedikuar për mësimdhënësit, nxënësit dhe prindërit, si dhe një aplikacion celular edukativ dhe informativ në fushën e sigurisë kibernetike që tashmë është ngarkuar në Play Store. Pushtetet lokale janë një hallkë e pashmangshme në të gjithë procesin e mbrojtjes nga bullizmi kibernetik.

Kryetari i Komunës Qendër, Goran Gerasimovski tha se lufta kundër bullizmit duhet të jetë e përbashkët dhe vetëm si e tillë do të reduktohet dhe parandalohet.

“Në komunën Qendër po punohet shumë seriozisht për ngritjen e vetëdijes për bullizmin dhe mbrojtjen nga ai. Në të tetë shkollat ​​tona, sidomos vitin e kaluar, kemi pasur shumë punëtori, trajnime dhe ligjërata nga psikologë, pedagogë, përfaqësues të Ministrisë së Arsimit dhe Shkencës, UNICEF-it dhe disa organizatave joqeveritare me qëllim që nxënësit të dallojnë bullizmin dhe mësimdhënësit dhe stafi profesional të mësojnë se si të veprojnë për ta parandaluar atë”, deklaroi Gerasimovski.

Allvin Salimovski, drejtor i shkollës “Vëllezërit Ramiz dhe Hamid”, theksoi se shifrat nga hulumtimi janë shqetësuese dhe prandaj mbrojtja e nxënësve nga rreziqet e mundshme është jashtëzakonisht e rëndësishme.

“Nga trajnimet që janë realizuar në shkollën tonë shihet se nxënësit nuk janë aq të painformuar, trajnuesit praktikisht punuan drejtpërdrejt në celularët e tyre dhe u treguan se çfarë mbrojtje duhet të aplikojnë dhe u habitën që disa nga nxënësit tashmë kanë mbrojtje të tillë. Megjithatë, ende mungon trajnimi i vazhdueshëm jo vetëm për nxënësit por edhe për mësimdhënësit për njohjen e sigurisë kibernetike”, tha Salimovski.

Projekti mbështetet nga Fondacioni Shoqëria e Hapur Maqedoni dhe ka për qëllim vlerësimin e aplikimit të mekanizmave dhe metodave për siguri kibernetike tek të rinjtë dhe të identifikojë se sa janë të informuar nxënësit për rreziqet që ekzistojnë në hapësirën kibernetike.

Të fundit