Kandidati për kryetar të Komunës së Çairit, Bujar Osmani, sot u përfshi drejtpërdrejt në Facebook nga profili i tij, para Televizionit të Maqedonisë, ku duhej të zhvillohej debati mes tij dhe kundërkandidatit të tij. Osmani njoftoi se, megjithëse ftesa nga MRTV ishte dërguar në mënyrë të rregullt, kundërkandidati i tij, Izet Mexhiti, nuk ishte paraqitur në debatin e planifikuar, duke shmangur, siç tha ai, përballjen e drejtpërdrejtë para qytetarëve.
“Sot në orën 12 duhej të zhvillohej debati mes meje dhe kundërkandidatit tim. Ftesa nga Televizioni i Maqedonisë ishte krejtësisht e rregullt dhe në të shkruhej se, edhe nëse njëri prej kandidatëve nuk paraqitet, karrigia do të mbetet bosh. Por ja, unë erdha dhe e lirova termin, i anulova takimet me qytetarët, që ata të mund ta shohin përballjen mes ofertave”, deklaroi Osmani, duke shtuar se qytetarët duhet të vlerësojnë pse Mexhiti është shmangur nga debati.
Ai theksoi se një sjellje e tillë tregon qasjen ndaj opinionit publik dhe mungesën e guximit për një debat të argumentuar.
“Unë mendoj se edhe Televizioni i Maqedonisë duhet ta mbajë fjalën e dhënë në ftesë, se në rast se njëri nga kandidatët nuk paraqitet, karrigia duhet të mbetet bosh. Dy kandidatët e tjerë pranuan, vetëm Mexhiti nuk pranoi”, theksoi Osmani.
Osmani shtoi se do të vazhdojë të takohet drejtpërdrejt me qytetarët, përmes takimeve dhe bisedave në çdo lagje, me një vizion dhe program të qartë për ndryshimin që, siç tha ai, po vjen më 19 tetor.
“Një ndryshim që nuk i shmanget përballjes, që ka guxim të flasë për të kaluarën, të tashmen dhe të ardhmen, ndryshe nga ata që përpiqen të fshihen pas kamerave”, tha Osmani.
