Në Ditën Botërore të Lirisë së Shtypit (3 maj), mesazh ka përcjellë edhe ambasadorja e SHBA-ve në RMV, Angela Aggeler, e cila theksoi se zgjedhjet nxjerrin në pah rolin vendimtar që media duhet dhe patjetër të luajë gjatë gjithë procesit, transmeton Portalb.mk.

“Sot është Dita Botërore e Lirisë së Shtypit dhe zgjedhjet nxjerrin në pah rolin vendimtar që media duhet dhe patjetër të luajë gjatë gjithë procesit. Shtyp i lirë dhe i gjallë që shqyrton faktet, komunikon idetë dhe propozimet te publiku dhe i shtyn zyrtarët të shpjegojnë qëndrimin e tyre për çështjet që kanë rëndësi për jetën e qytetarëve dhe të përcaktojnë rrjedhën e vendit”, tha ambasadorja Aggeler.

Në RMV me 8 maj do të mbahen zgjedhjet parlamentare dhe rrethi i dytë i zgjedhjeve presidenciale.

Ndërkaq sot, në Indeksin e Lirisë së Medias të Reporterëve pa Kufij (RSF) RMV-ja dhe pse me një rezultat të përgjithshëm më të dobët se vitin e kaluar, u ngjit me dy vende, nga 38 në 36, kjo pasi vendet e tjera në rajon u vlerësuan më keq.

Partitë politike dhe kandidatët presidencialë kanë edhe tre ditë kohë për të prezantuar programet dhe ofertat e tyre para se qytetarët të japin fjalën e tyre të fundit në zgjedhjet e 8 majit, pra të vendosin se kush do ta udhëheqë vendin në vitet e ardhshme dhe si do të jetë përbërja parlamentare, transmeton Portalb.mk.

Të hënën e 6 majit në mesnatë përfundon fushata si për zgjedhjet presidenciale ashtu edhe për ato parlamentare.

Më 7 maj fillon heshtja parazgjedhore dhe më pas të drejtën e votës do ta ushtrojnë personat e sëmurë dhe të pafuqishëm, të burgosurit dhe diaspora.

KSHZ-ja dje ia ka dorëzuar personit të autorizuar në Ministrinë e Punëve të Jashtme materialin votim për në PDK.
MPJ e dorëzon materialin e votimit menjëherë pas marrjes së tij dhe jo më vonë se deri në fund të ditës.

Anëtarët e Komisionet Zgjedhore (KZ) në Përfaqësitë Diplomatike-Konsullore (PDK) votojnë në KSHZ tri ditë para ditës së caktuar për mbajtjen e zgjedhjeve, përkatësisht më 4 maj.

Kujtojmë se në rrethin e parë të zgjedhjeve presidenciale 2024 nga numri i përgjithshëm i votuesve 1.1814.317 votuan 867.000 qytetarë apo 49,94%, prej të cilëve numri i votave të vlefshme ishte 881.272 ndërsa vota të pavlefshme dolën 24.562. Në bazë të rezultateve të fundit, dallimi mes Bujar Osmanit dhe Arben Taravarit ishte mbi 37 mijë vota, ndërsa mes Siljana Davkovës dhe Stevo Pendarovskit ishte mbi 182 mijë vota.

Rrethi i dytë i zgjedhjeve presidenciale do të mbahet me 8 maj së bashku me zgjedhjet parlamentare.

Kryetari i LSDM-së, Dimitar Kovaçevski në prag të zgjedhjeve parlamentare më 8 maj, sot porositi se “ai që nuk mund të formojë qeveri, i ka humbur zgjedhjet”, sepse, siç tha, qeveria formohet me minimum 61 deputetë.

“Së pari, ai që nuk mund të formojë qeveri do të thotë se i ka humbur zgjedhjet sepse qeveria formohet me minimum 61 deputetë. Do të shohim se si do të jenë rezultatet finale më 8 maj, sepse zgjedhjet akoma nuk kanë përfunduar dhe atëherë do të mund të bisedohet lidhur me formimin e qeverisë. Unë e di si duket formimi i qeverisë, duhet të keni minimum 61 deputetë për të formuar qeveri. Ngadalë, paj ne në zgjedhje jemi konkurrentë me VMRO-DPMNE-në, 8 maji le të vijë e më pas të shohim”, tha Kovaçevski pas takimit me përfaqësuesit e kryesisë së Odës ekonomike të Maqedonisë Veri-perëndimore.

Duke u përgjigjur në pyetje të gazetarëve lidhur me rritjen e retorikës nacionaliste në kuadër të fushatës, kryetari i LSDM-së potencoi se retorika nacionaliste nuk çon askund dhe potencoi se këto zgjedhje janë për të ardhmen.

“Unë tashmë i kam dënuar deklaratat edhe të z. Ahmetit lidhur me skandimin joadekuat në sheshin Maqedonia sepse ato janë skandime anakrone të cilat na kthejnë 20 vite pas në një të kaluar të groposur të cilën e kemi tejkaluar me Marrëveshjen kornizë të Ohrit, që e kemi tejkaluar me anëtarësimin në NATO falë LSDM-së dhe të cilën e kemi tejkaluar me fillimin e negociatave me BE-në sërish falë LSDM-së dhe gjithashtu e porosita edhe kryetarit të VMRO-DPMNE-së dhe kandidates preisdenciale të VMRO-DPMNE-së, Gordana Siljanovska se retorika nacionalite nuk çon aksund”, tha Kovaçevsski, i cili është bartës i listës për deputetë të Koalicionit të kryesuar nga LSDM në NJZ 1.

Shtoi se këto zgjedhje nuk janë për kthim prapa në të kaluarën, por janë për të ardhmen dhe se nuk janë për izolim, por për integrim në BE sepse, theksoi, izolimi mund të thotë izolim edhe brenda në kuadër të bashkësive etnike që do të thotë izolim edhe nga fqinjët dhe që do të thotë izolim final edhe i shtetit nga proceset evropiane.

Siç deklaroi Kovaçevski, LSDM mbetet opsioni i vetëm politik i cili lufton për shoqëri multietnike dhe për barazi të të gjithë qytetarëve pa dallim të përkatësisë së tyre në çfarëdo baze dhe për integrim të shtetit në BE.

Fronti Europian ka dalë me njoftim në lidhje me raundin e dytë të zgjedhjeve presidenciale, duke iu bërë thirrje qytetarëve që të vendosin vetë se për cilin kandidatë do të votojnë.

“Liderët e partive pjesë e Frontit Europian në mbledhjen e sotme në Strugë konstatuan se raundi i parë i zgjedhjeve presidenciale më 24 prill kaloi në atmosferë të qetë, fer dhe demokratike, ndërkohë që fitorja prej 40 mijë vota e dr.Bujar Osmanit ndaj Arben Taravarit – kandidatit të opozitës, është fitore e cila do të thellohem edhe më shumë më 8 maj, në Zgjedhjet parlamentare kur Fronti Europian do ta shënojë fitoren historike”.

“Me këtë rast, meqenëse Fronti Europian nuk është më pjesë e garës presidenciale në raundin e dytë të zgjedhjeve presidenciale dhe meqenëse vota e qytetarëve për ne është e shenjtë dhe e drejtë e tyre, Fronti Europian konstaton se është e vullnetin ekskluziv të qytetarëve se si do ta shfrytëzojnë këtë të drejtë”, thonë nga Fronti Europian.

Ndërkohë, edhe nga Koalicioni VLEN pritet të dalin me njoftim se cilin nga kandidatët për president do ta mbështesin në raundin e dytë të zgjedhjeve presidenciale./Telegrafi/

Njësitë e Punëve të Brendshme të Negotinës dhe Kavadarit janë të gatshëm për zgjedhjet e tetë majit, ndërsa qytetarët nëse kanë ndonjë kërcënim për prishjen e procesit zgjedhor, të raportojnë të njëjtat, theksoi sot zëvendësministri plotësues i Punëve të Brendshme Mitko Bojmacaliev i cili së bashku me drejtorin e DSP-së, Sasho Tasevski ishin për vizitë pune në territorin e Sektorit të Punëve të Brendshme.

Nga ana e drejtuesve të këtyre njësive organizative, theksoi Bojmacaliev, është njoftuar për rezultatet e arritura në tre muajt e fundit të këtij viti, si dhe kanë vlerësuar gjendjen e favorshme të sigurisë.

Shkarkohet këshilli i zgjedhor në vendvotimin 1112/1 në Komunën e Likovës, për shkak të parregullsive të paraqitur nga Kalicioni VLEN në rrethin e parë të zgjedhjeve presidenciale. Vendimi i këtillë i Komisioni Shtetëror të Zgjedhjeve u soll pas vendimit të Gjykatës Administrative për prishjen e votimit në këtë vendvotim në Likovë.

Pas këtij vendimi, anëtari i KSHZ-së, Abdush Demiri ka dërguar apel deri tek anëtarët e të gjithë këshillave vendorë që në zgjedhjet e 8 majit të jenë më të kujdesshëm.

“Të nderuar koleg, i nderuari opinion. Pas vendimit për të prishur rezultatin dhe pas vendimit për shkarkimin e këshillit vendor në vendvotimin 1112/1 në Komunën e Likovës, shfrytëzoj rastin që t’u drejtohem gjithë këshillave vendore si organe të rëndësishme për realizimin e procesit zgjedhor, që të jenë në nivel të detyrës të mundësojnë proces zgjedhor të qetë, fer dhe demokratik, për çdo shqetësim dhe parregullsi t’i notojnë dhe paraqesin në mënyrën e paraparë me ligjin për zgjedhje. Nga vendimi i sotëm për shkarkim sigurisht do të ketë iniciativë për ngritje të procedurës për përgjegjësi diciplinore dhe penale nga organet përkatëse për antarët e vendvotimit përkatës. Apeloj deri te të gjithë këshillat vendore që të mos lejojnë për asnjë çmim që dikush të ndikojë në punën tuaj, kryeni obligimin me përputhje me detyrimit e juaja sipas ligjit për zgjedhje”, deklaroi Demiri nga KSHZ.

Në zgjedhjet e dyfishta të 8 Majit, qytetarët kanë të drejtë vetëm njëherë të paraqiten nëpër vendvotime. Bëhet fjalë për rregullin zgjedhor që do të vlejë të mërkurën e 8 majit, kur mbahet rrethi I dytë I zgjedhjeve presidenciale dhe zgjedhjet parlamentare.

KSHZ-ja miratoi udhëzuesin, ku qytetarët njoftohen se nëse vendosin të votojnë vetëm për një palë zgjedhje, më pas nuk mund të ndërrojnë mendje dhe sërish të kthehen për të votuar për zgjedhjet tjera.

Kryetari i KSHZ-së, Aleksandar Dashtevski, gjatë një interviste për MIA-n, theksoi se me rëndësi është që qytetarëve t`u sqarohet se kanë të drejtë për të votuar për dy llojet e zgjedhjeve ose vetëm për parlamentaret dhe presidencialet.

“Qytetari mund të vijë vetëm një herë dhe të votojë për dy zgjedhjet. Procedura është si vijon ; kur vjen jep letërnjoftimin, shkon në identifikimin biometrik, rrethohet në listë dhe i japin fletëvotime për të votuar” – tha Dashtevski.

Por, me rëndësi për qytetarët është se kur në vendvotime do të pyeten, të kenë përgjigje të saktë nëse do të votojnë vetëm për një palë zgjedhje apo në zgjedhjet e dyfishta. Kjo është e rëndësishme pasi për zgjedhjet presidenciale ekziston cenzusi prej 40%.

“Supozoj se më së shumti do të votohet për dy zgjedhjet, kurse mund të ndodh vetëm për zgjedhjet parlamentare, pasi dihet se jehona dhe interesi është më I amdh për parlamentaret” – tha Dashtevski.

Kreu I KSHZ-së ka theksuar se natën e 8 majit, rezultatet e zgjedhjeve mund të dihen deri në mesnatë, duke marrë parasysh ndryshimet që KSHZ-ja I ka bërë gjatë periudhës së kaluar, por edhe përvojës me zgjedhjet paraprake.

“Kemi ndërmarrë masa për këto zgjedhje që të përforcojnë harduerin që njëkohësisht të pranojë sa më shumë informacione, kemi trajnuar më shumë njerëz në terren. Kemi të trajnuar rreth 1.700 njerëz që të fusin të dhënat, për të gjithë, në bashkëpunim me Entin e Statistikës, kemi siguruar 1.700 laptopë. Gjithashtu që të përshpejtohet procesi zgjedhor nëpër vendvotime, në vend të 5 personave do të ketë 7, kurse gjatë numërimit do të jenë të gjithë të pranishëm” – deklaroi Dashtevski.

Zgjedhjet e 11-ta me rradhë parlamentare mbahen më 8 maj bashkë me rrethin e dytë të zgjedhjeve presideciale.

Në zgjedhjet parlamentare, qytetarët votojnë për përbërjen e re parlamentare. Në Kuvend zgjidhen 120 deputetë sipas modelit proporcional, ku territori i vendit është ndarë në 6 njësi zgjedhore të konstatuar me Kodin Zgjedhor dhe në çdo njësi zgjedhore zgjidhen nga 20 deputetë. /tvklan.mk/

Koalicioni VLEN sot ka realizuar takim me përfaqësuesit e Odës Ekonomike të Maqedonisë Veri-Perëndimore në të cilën kanë folur për avancimin e bizneseve në vend.

Gjatë takimit kryetari i Lëvizjes Besa, Bilall Kasami tha se bashkërisht do të angazhohen në implementimin e politikave të Odës Ekonomike të Maqedonisë Veri-Perëndimore, në drejtim të avancimit të bizneseve për arritjen e zhvillimit ekonomik për të mirën e qytetarëve.

“Ne ishim në takim me Odën Ekonomike të Maqedonisë Veri-Perëndimore për të bashkëpunuar për pjesën ekonomike të programës dhe mundësitë e bashkëpunimit si qeveri e ardhshme me biznese. Ne jemi të lumtur që kemi pasur një komunikim shumë të rregullt me Odën Ekonomike të Maqedonisë Veri-Perëndimore ku si rezultat ne kemi implementuar shumë pika të programës të Odës Ekonomike të Maqedonisë Veri-Perëndimore në programën tonë parazgjedhore. Ajo që është më me rëndësi është se ne sot nënshkruam një memorandum bashkëpunimi, ku bashkërisht të angazhohemi që të implementojmë gjitha politikat e Odës Ekonomike të Maqedonisë Veri-Perëndimore në drejtim të avancimit të bizneseve që do të jetë një motor i zhvillimit ekonomik dhe rritjes së mirëqenies së qytetarëve”, tha Kasami.

Kasami shtojnë nga atje, nga zyrat e Odës Ekonomike të Maqedonisë Veri-Perëndimore tha se besojnë fuqishëm që pas 8 majit, koalicioni VLEN si pjesë e Qeverisë do të jetë në shërbim të qytetarëve dhe në shërbim të bizneseve tona me qëllim të ndaljes së këtij ekzodusi të rinisë tonë dhe qytetarëve tonë drejt perëndimit.