25/06/2024
23.8 C
Tetovo

Të tjera lajme

Forumi i Prespës për Dialog këtë vit do të mbahet më 15-16 qershor në Strugë

Ministri i Punëve të Jashtme, Bujar Osmani, sot mbajti një panel diskutimi me sektorin civil të vendit, përfshirë organizatat rinore, me të cilin njoftoi mbajtjen e Forumit të Prespës për Dialog 2023, i cili do të mbahet më 15 dhe 16 qershor 2023 në Strugë.

“PFD ngadalë po e gjen vendin e saj në hartën e forumeve të njohura ndërkombëtare dhe po shndërrohet në brendin tonë. Praktikisht, PFD është i vetmi forum me përmbajtje gjithëpërfshirëse që mbahet në Ballkanin Perëndimor. Konfirmimi i vlerës dhe rëndësisë së tij janë vlerësimet jashtëzakonisht pozitive të shprehura nga pjesëmarrësit e shumtë të lartë – nga një numër presidentësh dhe kryeministrash, ministrash të punëve të jashtme, përfaqësuesish të organizatave ndërkombëtare dhe rajonale dhe, natyrisht, të shoqërisë civile, duke përfshirë edhe nga disa think-tank të shquara të cilat kanë shprehur interes për vendosjen e bashkëpunimit me PFD. Një imazh i tillë pozitiv na obligon që ky edicion i ri të jetë po aq mirë i menduar dhe organizuar”, tha Osmani.

Siç njoftoi MPJ, Osmani duke iu referuar shkurtimisht edicioneve të kaluara, informoi për aktivitetet e iniciuara për realizimin e forumit të sivjetshëm, duke theksuar se PFD2023 do të pasqyrojë përvjetorin e pestë të nënshkrimit të Marrëveshjes së Prespës, kryesimin aktual të Maqedonisë së Veriut me Organizatën për Siguri dhe Bashkëpunim në Evropë – OSBE, SHBA – Kartën e Adriatikut (A5) dhe Procesin e Bashkëpunimit në Evropën Juglindore – PSJIE në një momentum kompleks gjeopolitik.

Osmani nënvizoi se PFD 2023 do të përpiqet të promovojë dialog konstruktiv, fqinjësi të mirë dhe bashkëpunim, në drejtim të gjetjes së zgjidhjeve diplomatike për sfidat aktuale dhe të ardhshme në nivel rajonal dhe ndërkombëtar, ndërsa ndër temat do të jenë lufta kundër korrupsionit dhe kërcënimeve hibride, migrimet, ndikimet e huaja malinje, masat kufizuese ndërkombëtare si dhe integrimi evropian i Ballkanit Perëndimor.

Sa i përket të rinjve, ai tha se është planifikuar të mbahet një PFD Rinore e veçantë më 14 qershor, në mënyrë që përfaqësuesit e të rinjve të mund t’i ndajnë konkluzionet e diskutimeve të tyre, në seancat dhe panelet e 15 dhe 16 qershorit.

“Përmes mbajtjes së PFD-së, ne përpiqemi, si shtet dhe si rajon, të kontribuojmë në promovimin e dialogut, besimit të ndërsjellë dhe bashkëpunimit, të cilat janë elemente kyçe në marrëdhëniet ndërkombëtare dhe paraqesin gur themeli për paqen dhe sigurinë afatgjate”, theksoi Osmani.

Të fundit