17/06/2024
20.1 C
Tetovo

Të tjera lajme

Ish-ministres malazeze që kundërshtoi ashpër “Ballkanin e Hapur” i ndalohet hyrja në Serbi, Podgorica kërkon sqarime nga Beogradi

Ministria e Punëve të Jashtme të Malit të Zi kërkoi nga Serbia që të sqarojë vendimin me të cilin i ndalohej hyrja në aeroportin e Beogradit të ish-ministres së Çështjeve Evropiane në Qeverinë e Malit të Zi, Jovana Maroviç.

Ministria njoftoi se shpreh besimin se “një praktikë e tillë nuk do të vazhdojë sepse cenon vlerat demokratike dhe pengon zhvillimin e mëtejshëm të marrëdhënieve të mira fqinjësore dhe bashkëpunimit rajonal”.

“Këto janë parakushtet kryesore për ndërtimin e një të ardhmeje të përbashkët evropiane, si prioritet kyç i politikës së jashtme të të dy vendeve”, theksoi Ministria malazeze e Punëve të Jashtme.

Në njoftim thuhej se Ministria pasi mësoi se Maroviçit i është refuzuar hyrja në Republikën e Serbisë në pikën kufitare në aeroportin “Nikola Tesla” në Beograd, e ka kontaktuar atë, ndërsa Ambasada e Malit të Zi në Beograd ka marrë masa për kthimin e dokumenteve personale të Maroviçit dhe mundësoi kthimin e saj në Mal të Zi po atë mbrëmje.

Maroviç u shënjestrua publikisht në mediat pro regjimit në Serbi për mbështetjen e protestave “Serbia kundër dhunës”, në të cilat ajo mori pjesë në Beograd.

Në nëntor të vitit të kaluar, Maroviç dha dorëheqjen nga posti i zëvendëskryeministrit dhe ministres për Çështjet Evropiane të Malit të Zi pasi departamenti i saj analizoi avantazhet dhe disavantazhet e pjesëmarrjes së Malit të Zi në nismën e Serbisë “Ballkani i Hapur”, të cilën ajo e kundërshtoi ashpër.

Para se t’i bashkohej Qeverisë së Abazoviçit dhe Lëvizjes URA, ajo ishte një aktiviste civile.

Të fundit