Në një ceremoni zyrtare të mbajtur në Cyrih, u nënshkrua Memorandumi i Mirëkuptimit dhe Bashkëpunimit ndërmjet Dhomës Zvicerane të Maqedonisë së Veriut (SwissCham MK), e përfaqësuar nga Kryetarja e Bordit Drejtues, znj. Sonja Stefanovska, dhe Konsullatës së Nderit të Republikës së Maqedonisë së Veriut në Gjenevë, e përfaqësuar nga Konsulli i Nderit, Sh. T. z. Zaim Jashari. Nënshkrimi i këtij Memorandumi shënon një hap të rëndësishëm në forcimin e bashkëpunimit ekonomik dhe institucional ndërmjet Zvicrës dhe Republikës së Maqedonisë së Veriut. Ai krijon një platformë strategjike për zhvillimin e marrëdhënieve dypalëshe, me fokus të veçantë në nxitjen e investimeve, zgjerimin e shkëmbimeve tregtare, mbështetjen e kompanive maqedonase dhe angazhimin më aktiv të diasporës në zhvillimin ekonomik të vendit. Memorandumi vendos një kornizë bashkëpunimi afatgjatë për intensifikimin e lidhjeve ndërmjet komunitetit të biznesit, institucioneve publike, sektorit akademik dhe organizatave të diasporës në të dy vendet. Bashkëpunimi do të konkretizohet përmes organizimit të forumeve ekonomike, takimeve B2B, delegacioneve të biznesit, programeve të trajnimit dhe iniciativave që synojnë shkëmbimin e njohurive, inovacionin dhe zhvillimin profesional. Kryetarja e Bordit Drejtues të SwissCham MK, znj. Sonja Stefanovska, theksoi se vlera e këtij partneriteti qëndron në ndërtimin e një rrjeti të qëndrueshëm besimi, bashkëpunimi dhe mundësish të reja ndërmjet Zvicrës dhe Maqedonisë së Veriut. Ajo nënvizoi se SwissCham MK do të vazhdojë të angazhohet në afrimin e kompanive, institucioneve, komunitetit akademik dhe diasporës, me synimin për të zhvilluar iniciativa dhe projekte të përbashkëta me ndikim afatgjatë. Konsulli i Nderit i Republikës së Maqedonisë së Veriut në Gjenevë, Sh. T. z. Zaim Jashari, theksoi se një nga objektivat kryesore të këtij bashkëpunimi është aktivizimi më i madh i diasporës maqedonase në zhvillimin ekonomik të vendit, si dhe krijimi i mundësive të reja për investime, partneritete dhe bashkëpunim ekonomik. Ai vlerësoi se Konsullata e Nderit do të vazhdojë të luajë rolin e një ure lidhëse dhe partneri të besueshëm ndërmjet institucioneve dhe kompanive zvicerane e maqedonase, duke kontribuar në rritjen e dukshmërisë, rrjetëzimit dhe prezencës së anëtarëve të SwissCham MK, veçanërisht në pjesën frankofone të Zvicrës. Gjatë vitit 2026, të dyja palët do të punojnë në përgatitjen dhe realizimin e një sërë aktivitetesh ekonomike dhe institucionale, forumeve të biznesit dhe iniciativave të përbashkëta, të cilat do të kontribuojnë në thellimin e bashkëpunimit dypalësh. Publiku do të informohet rregullisht për zhvillimet dhe aktivitetet në vijim. Ky Memorandum konfirmon përkushtimin e përbashkët të SwissCham MK dhe Konsullatës së Nderit të Republikës së Maqedonisë së Veriut në Gjenevë për ndërtimin e një partneriteti praktik, efikas dhe afatgjatë, të mbështetur në vlerat e njohura zvicerane të cilësisë, profesionalizmit, integritetit, transparencës dhe besueshmërisë.
