Ora e dorës që i solli telashe Arnold Schwarzenegger në aeroportin e Mynihut të mërkurën mblodhi 270.000 euro pasi u shit në një darkë në Austri për bamirësie e organizuar prej tij.
Veprimtaria, e cila mblodhi 1.31 milion euro në total, u ndoq nga i dërguari i SHBA-së për Klimën, John Kerry.
Schwarzenegger po përballet me procedura penale tatimore për mosdeklarimin e orës Audemars Piguet tek oficerët e doganës në Mynih pasi ai zbriti nga një fluturim nga Los Anxhelosi.
“Ai nuk ka deklaruar një produkt. Një produkt që u importua nga vende jo anëtare të BE-së për të mbetur në BE. Dhe ky proces vlen për të gjithë”, tha zyrtari i shtypit Thomas Meister.
Meister tha se ish-guvernatori i Kalifornisë dhe ylli i “Terminator” u lirua dhe udhëtoi pasi u mbajt për më shumë se dy orë./ CNN
