Eurodeputeti bullgar Andrej Kovaçev e cilësoi si “komik” shpjegimin e Ministrisë sonë të Punëve të Jashtme të RMV-së se më 6 maj nuk është lejuar të hyjë në territorin e vendit për shkak se ka qenë duke udhëtuar me persona që paraqesin rrezik për paqen dhe sigurinë publike, përcjell Telegrafi Maqedoni.
Kovaçev për “BTA” thotë se çështja kryesore është nëse ekziston apo jo një listë e zezë e qytetarëve evropianë që nuk lejohen në Republikën e Maqedonisë së Veriut.
Sipas tij, “reagimet e përfaqësuesve të Komisionit Evropian dhe Parlamentit Evropian, si dhe të qeverisë bullgare, alarmuan autoritetet në Shkup”.
“Reagim komik. Ministria e Punëve të Jashtme e Republikës së Maqedonisë së Veriut, me sa duket e presionuar nga ky reagim i qartë dhe shumë i prerë si nga Bullgaria ashtu edhe nga institucionet evropiane – Komisioni Evropian dhe Parlamenti Evropian, vendosi të dalë me një deklaratë se nuk ishte për shkak meje, por për shkak të dikujt tjetër për të cilin nuk ishte e qartë se kush është kërcënim për paqen dhe sigurinë e Republikës së Maqedonisë së Veriut. Kjo është arsyeja pse ata vendosën kolektivisht të refuzojnë hyrjen për të gjithë”, tha Kovaçev.
Për sot është paralajmëruar një konferencë për media e MPJ-së bullgare. Ministri bullgar i Punëve të Jashtme, Ivan Kondov, dje ka thirrur në takim ambasadoren e Maqedonisë në Bullgari, Agnesa Rusi Popovska, për rastin e moslejimit të hyrjes së pesë shtetasve bullgarë në RMV.
