Shkëndija përfundoi me obligimet evropiane dhe tërësisht i përkushtohet kampionatit vendor, kurse me fitoren ndaj Pelisterit ngushtoi diferencën e Vardarit në 4 pikë. Në xhiron e ardhshme zhvillohet derbi Vardari – Shkëndija. Në këtë kampionat, njollë e zezë vazhdon të mbetet referimi në ndeshje të caktuara ku protagonistë janë ekipet shqiptare.
Shkëndija regjistroi një fitore shumë të rëndësishme me përmbysje ndaj Pelisterit në xhiron e 20-të të Ligës së Parë të futbollit të Maqedonisë së Veriut, duke marrë tri pikë të mëdha që e afrojnë në vetëm katër pikë diferencë me liderin Vardarin, pikërisht tre ditë para përballjes së drejtpërdrejtë në Shkup.
Por, në përballjen e së hënës në Tetovë, në qendër të vëmendjes sërish ishin arbitrat. ShkupjanI Benjamin Kerimi me disa vendime të njëanshme provokoi reagimin e publikut.
Futbolldashësit tetovarë me të drejtë shtrojnë pyetjen se cfarë ndodh me arbitrat kur referojnë ndeshje të caktuara vecanërisht kur luajnë, thënë kushtimisht, ekipet shqiptare.
Pas takimit trajneri Jeton Beqiri tha se ishte një ndeshje për t`u harruar por se fitorja është e rëndësishme. Sipas tij, Shkëndija meriton më tepër respekt.
“E rëndësishme është që Shkëndija shënon fitore dhe e rëndësishme është që ne pas ndeshjes me Samsunsporin, pas udhëtimeve dhe stërmundimeve të gjata unë e pritja si ndeshje të ndërlikuar. Por për mua e rëndësishme është që morëm tre pikë. Për mua është e rëndësishme që reaguam pas pësimit të golit dhe gjithashtu karakteri i skuadrës është për tu përshëndetur për shkak se bëhen disa ndeshje që fitojnë në pjesën e dytë” deklaroi trajneri Jeton Beqiri
Në xhiron e ardhshme, të enjten, në stadiumin e FFM-së, zhvillohet derbi i madh Vardari – Shkëndija.
Sipas Beqirit, shqetësues është fakti se Shkëndija ka vetëm dy ditë për t`u përgatitur për ndeshjen me Vardarin, për dallim nga kundërshtari që ka pesë.
Beqiri do të jetë i detyruar të bëjë ndryshime në formacion pasi disa nga lojtarët janë të lënduar e disa do të pushojnë shkaku i kartonave.
‘’Kemi futbollist që janë me lëndime, kemi futbollist që morën kartonin e pestë që do jenë të suspenduar. Kështu që futbollistët të cilët do të jenë të gatshëm qind për qind në aspektin fizik dhe në gjithë aspektet tjera do mundohemi që të nxjerrim ekipin më të mirë të mundshëm për momentin. Pavarësisht se për mua gjithmonë është e rëndësishme që futbollistët që futen nga bankina se si do reagojnë për shkak se jo rastësisht ne sot futëm pesë futbollist të cilët janë futbollist të formacionit bazë’’ tha trajneri Beqiri
Pas kësaj ndeshje dhe gjithë asaj që ndodhi gjatë dhe pas përfundimit të takimit Shkëndija – Pelister, FFM-ja ka publikuar raportin e arbitrit, duke pretenduar për lëshime serioze në aspektin e sigurisë.
Por, në asnjë moment nuk ka përmendur qasjen e arbitrit ndaj lojtarëve vendas dhe ndaj lojës . FFM-ja në vend që të shpejtojë me komunikata duhet që me vëmendje të analizojë referimin dhe disa arbitra në ndeshje të caktuara, siç ishte rasti i fundit në Tetovë por edhe në Strugë.
