Në nderim të rreshterit Afrim Bunjaku të vrarë të dielën në mëngjes në veri, në sheshin “Times Square” në New York, në ekranin gjigand është shfaqur logo e policisë bashkë me atë të UÇK-së dhe FSK-së.
“Faleminderit heronjve tanë, Policisë së Kosovës. Rroftë Kosova Republikë”, ishte mbishkrimi që ishte vendosur tek fotografia ku shihej logo e Policisë së Kosovës, raporton Arbresh.info.
Në tjetër fotografi shihej edhe logo e UÇK-së ku shkruhej “Të vdesësh për atdhe është sikur të rilindësh përsëri – Afrim Bunjaku”.
Kjo video është publikuar në një faqe zyrtare të patundshmërive në Facebook, “Tafingo”.
Ndryshe, nga sulmi terrorist i bandave kriminale serbe mëngjesin e së dielës në veri, mbeti i vrarë rreshteri i Policisë së Kosovës, Afrim Bunjaku, ndërsa polici Alban Rashiti u plagos dhe dy të tjerë morën lëndime trupore.
Polici i plagosur Alban Rashiti është operuar me sukses në Klinikën e Kirurgjisë në Qendrën Klinike Universitare të Kosovës (QKUK) ku i është hequr predha nga krahasori i majtë.
Ndërkohë, tre nga sulmuesit serbë mbetën të vrarë nga Policia e Kosovës, ndërsa gjashtë të tjerë u arrestuan. /Arbresh.info/
