18/05/2024
22.5 C
Tetovo

Të tjera lajme

Nuk është e vërtetë që shkollat në RMV ​​do të mbyllen në dhjetor

Ndryshe nga pretendimi në postim, nuk ka asnjë njoftim apo konfirmim nga Qeveria se shkollat ​​do të mbyllen në dhjetor. Prej atje shprehen të vendosur që mësimi të mbahet me prezencë fizike. Gjithashtu, kryeministri nuk është as i paaftë përgjithmonë për të punuar, as i shqetësuar mendërisht, aq më pak këtë nuk ia kanë përcaktuar mjekët si diagnozë e përjetshme. Ai u vlerësua si i papërshtatshëm për shërbimin ushtarak për arsye shëndetësore, pra për shkak të ndërhyrjeve të mëvonshme kirurgjikale, shkruan Vërtetëmatësi.

Recensojmë një postim në Facebook që paraqet disa manipulime dhe dezinformata. Postimi pretendon se për shkak të krizës energjetike, shkollat ​​do të mbyllen në dhjetor, dhe më pas i referohet kryeministrit Dimitar Kovaçevski, për të cilin pretendon se “psikiatri ushtarak e ka diagnostikuar atë si të shqetësuar mendor dhe të paaftë përgjithmonë“.

Do të vjedhin gjithë TEC-in, gjithë EVN-në, do të gëlltisin miliona nga rryma e importuar, pastaj do të vendosin sanksione ndaj Rusisë me urdhër të NATO-s, pra tani që nuk do të ketë rrymë dhe ngrohje për dimër…

Imagjinoni, do t’i mbyllin shkollat ​​qysh në dhjetor!!!

Në mënyrë që të kursejnë milionat e veta, godasin fëmijët dhe arsimin, që gjithsesi janë të dobët. Do të shkojmë përsëri me mësim online, të cilat rezultuan katastrofike.

Le të jetojë analfabetizmi në vendin me Taçen në krye… E njihni?

Epo… Ai është një djalë i shqetësuar mendërisht dhe i paaftë përgjithmonë.

Kjo është diagnoza e tij nga psikiatër ushtarakë.

Duhet ta dini nga televizioni. Vërtet është i shqetësuar mendërisht, por shteti është top. A po?, thuhet në postimin në Facebook që po analizojmë.

Çështja nëse do t’i kthehemi mësimit online është bërë aktuale këto ditë, pasi komunat e rajonit të Pollogut kërkuan për shkak të krizës energjetike që pushimet dimërore të vazhdohen dhe të zgjasin për dy muaj ose të organizohet mësimi online. Ideja u prezantua nga kryetari i komunës së Gostivarit, Arben Taravari.

Duke qenë se faturat e energjisë elektrike janë më të larta se vitin e kaluar, vendosëm si ide të propozojmë që pushimet dimërore të fëmijëve të zgjasin dy muaj, në dhjetor dhe janar ose në janar dhe shkurt, në mënyrë që fëmijët të kenë pushim më të shkurtër gjatë verës dhe viti shkollor të vazhdojë deri më 30 qershor, ndërsa viti i ri shkollor të fillojë më 15 gusht. Ose ndoshta në tre muajt e dimrit, dhjetor, janar dhe shkurt, mësimi të jetë online. Jemi pak a shumë të dixhitalizuar, kemi eksperienca të mira gjatë pandemisë dhe pse kjo të mos zbatohet sërish në drejtim të kursimit të energjisë elektrike. Për këtë do të kemi nevojë për përkrahje nga Ministria e Arsimit dhe BNJVL-ja, ndërsa po na përkrahin edhe kryetarët e tjerë, tha Taravari.

Por, nga Qeveria asnjëherë nuk e kanë përmendur që mësimi online po konsiderohet si opsion, aq më pak ndonjë njoftim se shkollat ​​do të mbyllen në dhjetor, siç thuhet në postimin që po e analizojmë.

Përkatësisht, në fillim të vitit të ri shkollor, Ministria e Arsimit bëri me dije se në rast të ndonjë krize shëndetësore, energjetike apo mjedisore, shkollat ​​do të mbyllen të fundit dhe janë të parat që do të hapen.

Nëse kjo ndodh, shkollat ​​duhet të jenë të parat që do të rihapen. Situata do të monitorohet dhe për çdo vendim që ka të bëjë me mësimdhënien, publiku do të informohet në kohën e duhur – thanë nga MASH.

Sipas Qeverisë, është në interes të nxënësve që të ketë mësim me prezencë fizike. Nga aty janë të vendosur se nuk do të ketë ndryshim në mënyrën e realizimit të tij.

Duke iu përgjigjur pyetjes së një gazetari për kërkesën e një pjese të komunave për zgjatjen e pushimeve dimërore të nxënësve për të kursyer energjinë elektrike dhe dru zjarri dhe sa të justifikuara janë kërkesat që një pjesë e shpenzimeve dhe subvencioneve të mbulohen nga qeveria, zëdhënësi i qeverisë Dushko Arsovski tha se në seancën e kaluar të Qeverisë nuk është diskutuar për këtë.

Në seancën e fundit të Qeverisë nuk është diskutuar për këtë çështje. Qeveria mbetet e përkushtuar për tejkalimin e sfidave të shkaktuara nga kriza energjetike dhe është në komunikim me të gjitha palët e interesuara përmes Ministrisë së Arsimit dhe Shkencës.

Edhe ministri i Ekonomisë, Kreshnik Bekteshi po ashtu tha se po bëhen përpjekje që shkollave ​​fillore dhe të mesme t’u dilet në ndihmë dhe mësimi në periudhën e dimrit të zhvillohet me prezencë fizike.

Është nën kompetenca të komunave, por fëmijët humbën shumë gjatë pandemisë së Covid-it dhe tani për shkak të krizës energjetike është më mirë të ndihmohen shkollat ​​sesa t’i lëmë fëmijët të humbasin më shumë. Konsumi për pesë muajt, nga nëntori deri në mars, për të gjitha shkollat ​​në nivel shtetëror është rreth 10 gigavat orë dhe këtë mund ta sigurojmë përmes EMV-së dhe jam i bindur se do të gjejmë zgjidhje, tha Bekteshi në një intervistë për Sitel.

Sipas vlerësimeve të tij, shkollat ​​nuk duhet të kenë problem deri në fund të marsit.

Pra, nuk ka asnjë njoftim apo konfirmim nga Qeveria se shkollat ​​do të mbyllen në dhjetor. Prej aty janë të vendosur që mësimi të mbahet me prezencë fizike.

Postimi i referohet edhe kryeministrit Dimitar Kovaçevski, për të cilin ai pretendon se “psikiatër ushtarakë e kanë diagnostikuar si të shqetësuar mendor dhe të paaftë përgjithmonë“. Dhe ky është debat që po vazhdon së fundmi dhe posaçërisht po imponohet nga opozita VMRO-DPMNE, duke e shfrytëzuar për të kërkuar dorëheqjen e kryeministrit Kovaçevski.

Sipas VMRO-DPMNE-së, kryeministri Kovaçevski e ka shmangur shërbimin ushtarak, duke u arsyetuar me konstatim mjekësor se është përherë i papërshtatshëm për shërbimin ushtarak. Në një konferencë për media, partia opozitare prezantoi edhe një dokument për të cilin pretendojnë se është nxjerrë nga libri i të dhënave të ARM-së.

Ky dokument tregon qartë se Kovaçevski është shpallur i paaftë përgjithmonë nga mjekët. Kjo çon në dy përfundime. Ose Kovaçevski ka keqpërdorur ndikimin e babait të tij, i cili atëherë ishte kryetar i Komunës së Kumanovës dhe funksionar partiak i SDS-së dhe ka marrë mendim të rremë mjekësor, ose është me të vërtetë i paaftë përgjithmonë, tha Dragan Kovacki, deputet dhe anëtar i Komitetit Ekzekutiv të VMRO -DPMNE-së.

Sipas opozitës, mjekët kanë konstatuar se kryeministri Kovaçevski është i paaftë përgjithmonë për të kryer shërbimin ushtarak, por jo se është i shqetësuar mendërisht siç thuhet në postimin që po e analizojmë.

Çrregullimi mendor mund të jetë gjendje e çrregullimit mendor dhe çrregullimeve të shkaktuara nga përdorimi i substancave psikoaktive, skizofreni, çrregullime skizotipale dhe delirante, çrregullime të humorit, depresion, çrregullime neurotike që lidhen me stresin dhe të ngjashme. Por nga VMRO-DPMNE-ja opozitare askund dhe asnjëherë nuk kanë përmendur se në dokumentet që kanë hasur shkruhet se mjekët e kanë diagnostikuar kryeministrin Kovaçevski me çrregullim mendor. Është padyshim një sajesë e autorit të postimit që po e recensojmë. Paaftësia e përhershme e Kovaçevskit që e përmend opozita mund të jetë për shumë arsye. Për shembull, nëse një person është daltonist, diabetik, nëse ka operacion që e pamundëson të kryejë aktivitetet e përditshme, ai mund të mos jetë në gjendje të kryejë përgjithmonë disa aktivitete.

Akuzave të opozitës, Kovaçevski i është përgjigjur përmes një deklarate duke thënë se asnjëherë nuk i është shmangur apo ka ikur nga përgjegjësia për të kryer shërbimin ushtarak. Ai ka theksuar se gjatë asaj periudhe ka pasur një intervenim të mëvonshëm kirurgjik dhe për këtë ka qenë i paaftë përgjithmonë për shërbimin ushtarak.

VMRO-DPMNE nuk zgjedh asnjë mjet apo mënyrë për të larguar vëmendjen e publikut nga skandalet e mëdha korruptive dhe turbullirat në partinë e tyre. Vetëm konfirmon se gjithçka që kemi parë në publik gjatë javës së kaluar është e vërtetë dhe VMRO-DPMNE është në një krizë të madhe. Asnjëherë nuk jam larguar apo ikur nga përgjegjësia e shërbimit ushtarak. Vetëm njerëz të pandershëm dhe të frikësuar abuzojnë me sfidën shëndetësore të dikujt dhe operacionin e para 20 viteve, për të mbuluar turpin dhe krimin e tyre. Por unë nuk jam i befasuar. Nuk më befasojnë të gjitha gënjeshtrat e tjera, shpifjet, lajmet e rreme dhe manipulimet e VMRO-DPMNE-së, thuhet në përgjigjen me shkrim të Kovaçevskit.

Në seancën për pyetjet e deputetëve, ka shpjeguar pse nuk ka kryer shërbimin ushtarak.

Në vitin 2000, sipas të gjitha procedurave ligjore bazuar në ligjin e mbrojtjes të vitit 1992, neni 51 dhe në kuadër të një procedure publike shumëfazore bazuar në mendimin e ekspertëve mjekësorë dhe për shkak të problemit tim të shëndetit të barkut, me të cilin ende përballem, është regjistruar pamundësia ime për të kryer detyrimin ushtarak. Një fakt të tillë nuk e kanë konstatuar unë, as familja ime, por persona të panjohur për mua në komisionet e rekrutimit. Dhe kjo në vitin 2000 para konfliktit ushtarak dhe krizës në 2001. Nuk jam as rasti i parë dhe as i fundit i bazuar në një gjendje objektive mjekësore. Unë kam komunikuar qartë, me zë të lartë dhe plotësisht dhe po e komunikoj të vërtetën, tha Kovaçevski.

Pra, kryeministri nuk është i shqetësuar mendërisht, aq më pak është diagnostikuar nga mjekët me diagnozë e përjetshme. Ai u gjykua si i paaftë përgjithmonë për shërbimin ushtarak për arsye shëndetësore, pra për ndërhyrje kirurgjikale të mëvonshme.

Nga të gjitha më sipër, mund të përfundojmë se postimi shërbehet me manipulime dhe gënjeshtra dhe për këtë e vlerësojmë si të pavërtetë.portalb.mk/

Të fundit