Plazma e gjakut e pacientëve që kanë fituar imunitet ndaj COVID-19, është shpresë për kurimin e personave që ende po luftojnë me këtë virus, deri në zbulimin e një vaksine. Plazma është pjesë përbërëse e lëngshme e gjakut, 95% e të cilës është ujë, ndërsa pjesa tjetër përbëhet nga proteina, ndërkohë që në të ndodhen edhe antitrupat që luftojnë virusin. Trajtimi i të infektuarve, me këtë terapi, ka filluar të zbatohet edhe në vendin tonë. Burime nga Klinika Infektive thonë se gjendja shëndetësore e dy pacientëve që fillimisht i janë nënshtruar trajtimit me plazmë kovaleshente është përmirësuar dukshëm, ndërsa prej dje kjo terapi po zbatohet edhe tek pacientë të tjerë.
Trajtimi me plazmë gjaku po zbatohet tek 5 pacientë. Jepet një përdorim dhe më pas ndiqet gjendja klinike dhe parametrat laboratorik. Nevojitet kohë për ndjekje të efekteve dhe kjo bëhet sipas një protokolli preciz – njoftojnë nga Ministria e Shëndetësisë.
Drejtori i Institutit të Transfuziologjisë, Sadulla Useini, thotë se që të shëruarit të mund të dhurojnë plazmë, fillimisht duhet t’u nënshtrohen dy testeve për COVID-19. Në raste se të njëjtët rezultojnë negativë, pas 21 ditësh u bëhet edhe një test i tretë. Nëse edhe rezultati i testit të fundit është negativ, atëherë personi në fjalë kategorizohet si dhurues. Ky i fundit duhet të ketë të njëjtin grup gjaku me pacientin që do të trajtohet.
Një nga kushtet për të dhuruar plazmë është që të ketë edhe antitrupa në serumin e tij. Nëse ka përqendrim të mjaftueshëm, atëherë ai mund të dhurojë plazmë konvaleshentë çdo dy javë. Ne çdo ditë hasim transfuzion të plazmës dhe i vetmi simptomë si reaksion që paraqitet në këto raste, janë reaksionet alergjike. Mirëpo ato janë shumë të rralla dhe lehtë trajtohen. Në bëjmë trajtimin e pacientëve me plazmë dhe atë diku rreth 200-300 ml me një trajtim – tha Sadulla Useini- Drejtor i Institutit të Transfuziologjisë.
Pacientët që trajtohen, monitorohen nga stafi mjekësorë, veçanërisht në ditën e parë, të tretë dhe të pestë dhe në rast se nuk shfaq përmirësim, atëherë të njëjtët I nënshtrohen edhe një terapie dhe përsëri monitorohen. Drejtor i Institutit të Transfuziologjisë, thotë se të infektuarit mund të marrin vetëm dy terapi me plazmë gjaku.
Për nxjerrjen e plazmës nga trupi i të shëruarit nevojiten 60 deri 90 minuta. Një makineri thithëse merr në të njëjtën kohë plazma dhe gjak, duke i vendosur në qese të ndryshme. Pas përfundimit të procedurës, gjaku rikthehet në trupin e dhuruesit.
Mjekësia ka përdorur transfuzionin e plazmës konvaleshente për trajtim të të sëmurëve edhe në të kaluarën, madje që në vitin 1918 kur bota po luftonte Gripin Spanjoll. Kjo procedurë është përdorur edhe në vitet e mëvonshme për trajtimin e të infektuarve nga virusi SARS, Ebola dhe H1N1. Të infektuarit nga COVID-19 që trajtohen me plazmë konvaleshente nuk kanë asnjë shpenzim./Lajm./
