Ministri i Shëndetësisë, Fatmir Mexhiti ka zhvilluar një takim me përfaqësuesit e Odës së Mjekëve në RMV ku temë qëndrore ka qenë përballja me sfidat e migrimit të mjekëve dhe sfidat me të cilat ballafaqohen mjekët në vendin tonë, njoftuan nga Ministria.
Në këtë takim, njoftojnë nga MSH, u theksua se e njohim kontributin e çmuar që japin mjekët në sistemin tonë të kujdesit shëndetësor dhe e kuptojmë rëndësinë e kësaj, prandaj duam të jemi të sigurtë që ata të kenë mbështetjen që u nevojitet për të vazhduar të ofrojnë kujdes cilësor. Pyetja mbi çështjen e migrimit të mjekëve është një çështje komplekse dhe ne jemi të përkushtuar të punojmë me Odën e Mjekëve për të gjetur zgjidhje efektive.
Gjatë takimit, diskutuam mënyrat për të shkurtuar procedurat administrative për mjekët, duke e bërë më të lehtë punësimin e tyre, të ballafaqohen me sistemin dhe të fokusohen në atë që ata e bëjnë më së miri – kujdesin ndaj pacientit.
“Besojmë se nga kjo do të përfitojnë jo vetëm mjekët, por edhe do të përmirësojnë cilësinë e përgjithshme të kujdesit shëndetësor në vendin tonë. Diskutimi ishte produktiv në drejtim të gjetjes së zgjidhjeve nga të cilat do të përfitojnë të gjitha palët e përfshira”, thuhet në kumtesën e Ministrisë së Shëndetësisë.
